കോന്നി വാര്‍ത്ത ഡോട്ട് കോം : വാഹനമിടിച്ച് ഗുരുതരമായി പരിക്ക് പറ്റി റോഡില്‍ കിടന്ന തെരുവ് നായയെ എടുത്ത് മൃഗാശുപത്രിയിൽ എത്തിക്കുകയും ചികിത്സക്ക് ശേഷം രണ്ട് കാലുകളിലും പ്ലാസ്റ്റർ ഇട്ട നായയുടെ പൂര്‍ണ്ണ സംരക്ഷണം ഏറ്റെടുത്ത് ആഹാരവും മരുന്നും നൽകി സംരക്ഷിക്കുകയാണ് ഈ യുവാവ് .
കോന്നി അരുവാപ്പുലം അക്കരക്കാലപടി റോഡില്‍ വെച്ചാണ് തെരുവ് നായ്ക്ക് വാഹനം ഇടിച്ചു ഗുരുതര പരിക്കേറ്റത് . അരുവാപ്പുലം പഞ്ചായത്തിന്‍റെ കീഴിൽ പ്രവർത്തിക്കുന്ന കോവിഡ് സെന്ററിലെ ജീവനക്കാരനും ഡി വൈ എഫ് ഐ ഐരവൺ യൂണിറ്റ് വൈസ് പ്രസിഡന്‍റുമായ ചാക്കലേത് വീട്ടില്‍ അഭിജിത്ത് മോഹനനാണ് തെരുവ് നായ്ക്ക് പുനര്‍ജന്‍മം നല്‍കിയത് .
വാഹനം ഇടിച്ചു ഇരു കാലുകളും ഒടിഞ്ഞ തെരുവ് നായ ഇഴയുന്നത് കണ്ട അഭിജിത്ത് നായയെ ഉടന്‍ തന്നെ കോന്നി മൃഗാശുപത്രിയിൽ എത്തിച്ചു . ചികിത്സക്ക് ശേഷം രണ്ട് കാലുകളിലും പ്ലാസ്റ്റർ ഇട്ട നായക്ക് ആഹാരവും മരുന്നും നൽകി സംരക്ഷിക്കുകയാണ് ഈ മൃഗസ്നേഹി.
നായയുടെ ആരോഗ്യം വീണ്ടെടുക്കുന്നത് വരെ സംരക്ഷണം ഒരുക്കുമെന്ന് അഭിജിത്ത് പറഞ്ഞു .
കോവിഡ് വ്യാപനം ഉണ്ടായപ്പോള്‍ സഹജീവികളുടെ ജീവന്‍ രക്ഷിക്കാന്‍ മുന്നണി പോരാളിയായി . നാട്ടിലെ ഏത് ജനകീയ ആവശ്യങ്ങള്‍ക്കും അഭിജിത്ത് മുന്നില്‍ ഉണ്ട് . ജീവകാരുണ്യ പ്രവര്‍ത്തി ചെയ്യുന്ന അഭിജിത്തിന് ആശംസകള്‍ നേരുന്നു .