പാലാരിവട്ടം പാലം അഴിമതി കേസിൽ മുൻ പൊതുമരാമത്ത്‌ മന്ത്രിയും മുസ്‌ലീം ലീഗ്‌ നേതാവുമായ വി കെ ഇബ്രാഹിം കുഞ്ഞിനെ കസ്‌റ്റഡിയിലെടുക്കാൻ വിജിലൻസ്‌ സംഘം വീട്ടിലെത്തിയെങ്കിലും ഇബ്രാഹിം കുഞ്ഞ് ആശുപത്രിയില്‍ പ്രവേശിച്ചു .വിജിലന്‍സ് നീക്കം ആരോ ചോര്‍ത്തി എന്നാണ് സംശയം . ആലുവയിലെ വീട്ടിലാണ്‌ സംഘം എത്തിയത്‌.കേസിൽ അഞ്ചാംപ്രതിയാണ്‌ ഇബ്രാഹിംകുഞ്ഞ്‌.
മേൽപ്പാലം നിർമാണക്കമ്പനിയായ ആർഡിഎസിന്‌ ചട്ടവിരുദ്ധമായി 8.25 കോടി രൂപ മുൻകൂർ നൽകിയത്‌ ഇബ്രാഹിംകുഞ്ഞിന്റെ നിർദേശപ്രകാരമാണെന്ന്‌ മുൻ പൊതുമരാമത്ത്‌ സെക്രട്ടറി ടി ഒ സൂരജ്‌ മൊഴി നൽകിയിരുന്നു. ഫെബ്രുവരി അഞ്ചിനാണ്‌ ഇബ്രാഹിംകുഞ്ഞിനെ പ്രോസിക്യൂട്ട്‌ ചെയ്യാൻ ഗവർണർ അനുമതി നൽകിയത്‌.
മേൽപ്പാലം അഴിമതിക്കേസിൽ ടി ഒ സൂരജിന്‌ പുറമെ കരാർ കമ്പനിയായ ആർഡിഎസിന്റെ എംഡി സുമിത്‌ ഗോയൽ, ആർബിഡിസികെ മുൻ അസി. മാനേജർ എം ടി തങ്കച്ചൻ, കിറ്റ്‌കോ മുൻ ജോയിന്റ്‌ ജനറൽ മാനേജർ ബെന്നി പോൾ എന്നിവരെ നേരത്തെ അറസ്റ്റ് ചെയ്‌തിരുന്നു.