ഭരണസമിതിയും പ്രതിപക്ഷവും പഞ്ചായത്ത് സെക്രട്ടറിക്കെതിരെ രംഗത്ത്
കോന്നി: കോന്നി ഗ്രാമ പഞ്ചായത്തിന് കീഴിൽ വരുന്ന പാറമടകൾക്ക് ഗ്രാമപഞ്ചായത്ത് ഭരണ സമിതിയും പ്രതിപക്ഷ അംഗങ്ങളും അറിയാതെ ഗ്രാമപഞ്ചായത്ത് സെക്രട്ടറി ക്രമവിരുദ്ധമായി ലൈസൻസ് പുതുക്കി നൽകിയതിനെ തുടർന്ന് സെക്രട്ടറിയെ തൽസ്ഥാനത്ത് നിന്ന് മാറ്റണമെന്നാവശ്യപ്പെട്ട് കോന്നി ഗ്രാമപഞ്ചായത്ത് പ്രസിഡന്‍റ് എം രജനി സംസ്ഥാന പഞ്ചായത്ത് വകുപ്പ് ഡയറക്ടർക്ക് കത്ത് നൽകി.പ്രതിപക്ഷ അംഗവും ഇതേ ആവശ്യത്തില്‍ ഉറച്ചു നില്‍ക്കുന്നു .
പഞ്ചായത്ത് അനുമതിയോടെ പ്രവർത്തിച്ച് വരുന്ന പാറമടകളിൽ പാരിസ്ഥിതികപ്രശ്നങ്ങൾ നിലനിൽക്കുന്നുണ്ട്.ഇതില്‍ വ്യാപക പരാതിയും ഉണ്ട് . എല്ലാ അനുബന്ധ രേഖകളുമായി വരുന്ന പാറമടകൾക്ക് വർഷാവർഷം ലൈസൻസ് കൊടുത്ത് പോരുന്ന രീതിയാണ് നിലവിലുള്ളത്. പാറമടകൾ കാരണം പരിസ്ഥിതി പ്രവർത്തകരുടേയും പൊതു ജനങ്ങളുടെയും പരാതികളും പഞ്ചായത്തിൽ ഇടയ്ക്ക് ലഭിക്കാറുണ്ട്. പാറമടകളോട് ചേർന്ന് ഒഴുകുന്ന ജലാശയങ്ങളിലെ മാലിന്യ പ്രശ്നങ്ങളും ചർച്ചയാകാറുണ്ട് 5.3.2020ൽ കൂടിയ പഞ്ചായത്ത് കമ്മിറ്റിയിൽ ആവശ്യമായ രേഖകൾ ഹാജരാക്കുന്ന പാറമടകൾക്ക് ഒരു വർഷ ലൈസൻസ് കൊടുക്കുന്നതിന് തീരുമാനിച്ചിരുന്നു.ഈ അവസരത്തിൽ 2020 – 21 വർഷത്തെ ലൈസൻസുമായി ബന്ധപ്പെട്ട് പഞ്ചായത്ത് ഭരണ സമിതിയെ ബോധ്യപെടുത്താതെ സെക്രട്ടറി ഒരു വര്‍ഷത്തില്‍ കൂടുതല്‍ ഉള്ള ലൈസൻസ് അനുവദിച്ച് നൽകുകയായിരുന്നു.തുടർന്ന് രേഖകൾ പരിശോധിച്ചപ്പോൾ ആവശ്യമായ രേഖകൾ ഈ വർഷം നൽകിയ ലൈസൻസിനില്ല എന്ന് ഭരണസമിതിക്ക് ബോധ്യപെട്ടു.പഞ്ചായത്ത് കമ്മിറ്റിയിൽ പാറമടകൾക്ക് ഒരു വർഷത്തെ ലൈസൻസ് കൊടുക്കുന്നതിനും വരും വർഷങ്ങളിൽ രേഖകൾ പരിശോധിച്ച് പാരിസ്ഥിതികപഠനം നടത്തി ലൈസൻസ് നൽകിയാൽ മതിയെന്ന് തീരുമാനമെടുത്ത് നടപ്പാക്കുന്നതിന് സെക്രട്ടറിയെ ചുമതലപ്പെടുത്തിയിരുന്നു. എന്നാൽ ഒരു ക്വാറി ഉടമ ഹൈക്കോടതിയെ സമീപിച്ച് സർക്കാരിനെതിരെ അപ്പീൽ കൊടുത്തു.ഈ വിവരങ്ങൾ കാണിച്ച് കോന്നി പഞ്ചായത്തിലേക്ക് കോടതിയില്‍ നിന്നും സമൻസും വന്നിരുന്നു.എന്നാൽ സെക്രട്ടറി ഈ വിവരം പഞ്ചായത്ത് ഭരണ സമതിയെയോ പ്രതിപക്ഷ അംഗങ്ങളെയോ അറിയിക്കാതെ രണ്ട് മാസം സമൻസ് പൂഴ്ത്തി വെച്ചു എന്നാണ് ഭരണ കക്ഷി ആരോപണം . തുടർന്നാണ് ഗ്രാമപഞ്ചായത്ത് സ്റ്റിയറിംഗ് കമ്മിറ്റി വിളിച്ച് ചേർത്ത് സെക്രട്ടറിയെ തൽ സ്ഥാനത്ത് നിന്ന് മാറ്റണമെന്ന് തീരുമാനമെടുത്തത്. പഞ്ചായത്ത് സെക്രട്ടറിക്കെതിരെ വിജിലൻസ് അന്വേഷണം വേണമെന്നാണ് പ്രതിപക്ഷവും ആവശ്യം ഉന്നയിച്ചു .