കോന്നി വാര്‍ത്ത ഡോട്ട് കോം : മാലിന്യനിർമാർജനത്തിന് കോന്നി ഗ്രാമപഞ്ചായത്ത് മുന്തിയ പരിഗണനയാണ് നൽകി വരുന്നത് . എന്റെ ഗ്രാമം ശുചിത്വ സുന്ദര സുരക്ഷിത ഗ്രാമം പദ്ധതി ആവിഷ്ക്കരിച്ച് ഗ്രാമ പഞ്ചായത്ത് ഭരണ സമിതി ഇതിനായി നടപ്പിലാക്കി വരികയാണ് ഇതിന്റെ ഭാഗമായി ജൈവ മാലിന്യം സംസ്കരിക്കുന്നതിന് എയ്റോബിൻ കമ്പോസ്റ്റ് യൂണിറ്റുകൾ സ്ഥാപിക്കുകയും അവിടെ ലഭിക്കുന്ന ജൈവമാലിന്യം സംസ്കരിച്ച് ‘കർഷകമിത്രം’ എന്ന പേരിൽ വളം ആക്കി മാറ്റുന്ന എന്ന പ്രക്രിയ നടന്നുവരുന്നു. ഇതോടൊപ്പംതന്നെ അജൈവ മാലിന്യങ്ങൾ ശേഖരിച്ച് തരംതിരിച്ച് ക്ലീൻ കേരള കമ്പനിക്ക് നൽകുന്ന നടപടികളും നടന്നുവരികയാണ് .ഇതിനായി പ്ലാസ്റ്റിക് ഉൾപ്പെടുന്ന അജൈവ മാലിന്യങ്ങൾ ശേഖരിച്ച് തരംതിരിക്കുന്നതിനായി നാരായണപുരം ചന്തയിൽ അജൈവ മാലിന്യ സംഭരണകേന്ദ്രംസ്ഥാപിച്ച് പ്രവർത്തനമാരംഭിച്ചു കഴിഞ്ഞു അതോടൊപ്പം തന്നെ വാർഡുകൾ കേന്ദ്രീകരിച്ച് അജൈവ മാലിന്യം തരംതിരിച്ച് ശേഖരിക്കുന്നതിനായി മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതിയിൽ ഉൾപ്പെടുത്തി മിനി എം സി എഫ് നിർമ്മിക്കുന്ന നടപടികൾ ആരംഭിച്ചു. 18 വാർഡുകളിലും പ്രധാനപ്പെട്ട സ്ഥലങ്ങൾ കേന്ദ്രീകരിച്ച് സ്ഥാപിക്കുന്ന അജൈവ മാലിന്യ സംഭരണ കേന്ദ്രത്തിൽ അതാത് വാർഡിലെ പ്ലാസ്റ്റിക് ഉൾപ്പെടുന്ന ന അജൈവ മാലിന്യങ്ങൾ തരം തിരിച്ച് ശേഖരിച്ച് വയ്ക്കുകയും അത് അവിടെനിന്നും ചന്തയിൽ സ്ഥാപിച്ചിരിക്കുന്ന പ്രധാന സംഭരണ കേന്ദ്രത്തിലേക്ക് എത്തിച്ച് അവിടെനിന്നും ക്ലീൻ കേരള കമ്പനിയ്ക്ക് കൈമാറുന്നതാണ്. മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതിയിൽ ഉൾപ്പെടുത്തി നിർമ്മിക്കുന്ന മിനി എം സി എഫ് കൾ 35,000 രൂപയാണ് നിർമ്മാണ ചെലവ് വരുന്നത്. സാധനങ്ങൾ വാങ്ങുന്നതിനായി 27 617 രൂപയും തൊഴിലുറപ്പ് തൊഴിലാളികൾക്കുള്ള വേതനമായി 9383 രൂപയും ആണ് ഉൾപ്പെടുത്തിയിരിക്കുന്നത്. ഇതിൽ 13 തൊഴിൽദിനങ്ങൾ ലഭിക്കും. പഞ്ചായത്തിലെ വാർഡ് 2 ൽ ആഞ്ഞിലികുന്ന് ആരോഗ്യ കേന്ദ്രത്തിൽ സ്ഥാപിച്ച ആദ്യ മിനി എം.സി.എഫ് ന്റെ ഉദ്ഘാടനം ഗ്രാമപഞ്ചായത്ത് പ്രസിഡണ്ട് രജനി എം നിർവഹിച്ചു. വൈസ് പ്രസിഡൻറ് പ്രവീൺ പ്ലാവിളയിൽ അധ്യക്ഷത വഹിച്ചു വികസനകാര്യ സ്റ്റാൻഡിങ് കമ്മിറ്റി അധ്യക്ഷ ദീനാമ്മ റോയ്, ആരോഗ്യ-വിദ്യാഭ്യസ സ്റ്റാൻഡിങ് കമ്മിറ്റി അധ്യക്ഷ അനി സാബു,ക്ഷേമകാര്യ സ്റ്റാൻഡിങ് കമ്മിറ്റി അധ്യക്ഷൻ മോഹനൻ കാലായിൽ പഞ്ചായത്ത് അംഗങ്ങളായ ഇ.പി ലീലാമണി,ലിസി സാം, രല്ലു. പി, സജി പീടികയിൽ, വിജയമ്മ വിജയൻ, ലൈല ഹുസൈൻ, പുഷ്പ കൃഷ്ണൻകുട്ടി എന്നിവർ പ്രസംഗിച്ചു