konnivartha.com: കോന്നി താലൂക്ക് ആശുപത്രിയുടെ അന്തിമ ഘട്ടത്തിൽ എത്തിയ കെട്ടിട നിർമ്മാണം വേഗത്തിൽ പൂർത്തീകരിക്കുവാൻ അഡ്വ. കെ യു ജനീഷ് കുമാർ എംഎൽഎ നിർദ്ദേശം നൽകി.കോന്നി താലൂക്ക് ആശുപത്രിയുടെ നിർമാണ പുരോഗതി വിലയിരുത്താനായി ചേർന്ന യോഗത്തിൽ സംസാരിക്കുകയായിരുന്നു എം എൽ എ.
കോന്നി താലൂക്ക് ആശുപത്രിയിലെ 12 കോടി രൂപയുടെ നിർമ്മാണ പ്രവർത്തികളുടെ പുരോഗതി എം എൽ എ വിലയിരുത്തി .ആശുപത്രി നിർമ്മാണത്തിന്റെ അന്തിമഘട്ടത്തിൽ എത്തിയ പ്രവർത്തികൾ പൂർണ്ണമായും മൂന്നു മാസം കൊണ്ട് വേഗത്തിൽ പൂർത്തികരിക്കണമെന്നും എം എൽ എ പൊതു മരാമത്ത് ഉദ്യോ ഗസ്ഥരോടും കരാറുകാരനോടും നിർദ്ദേശിച്ചു.
നിർമ്മാണത്തിലിരിക്കുന്ന കെട്ടിടത്തിലെ രണ്ടാം നിലയിൽ നിർമ്മാണ പ്രവർത്തനം പുരോഗമിക്കുന്ന ലക്ഷ്യ നിലവാരത്തിലുള്ള ഗൈനക്കോളജി ഓപ്പറേഷൻ തിയേറ്ററിൻ്റെയും, ഗൈനക്കോളജി വാർഡിന്റെയും നിർമ്മാണം മെയ് മാസം പൂർത്തീകരിക്കും.
നിർമ്മാണ പ്രവർത്തികൾ അന്തിമഘട്ടത്തിൽ എത്തിയ ഒ പി ബ്ലോക്കിന്‍റെ നിർമ്മാണ പ്രവർത്തനവും അടുത്ത മാസം കൊണ്ട് പൂർത്തീകരിക്കും.
കണ്ണ് ഓപ്പറേഷൻ തിയേറ്റർ, ഡയാലിസിസ് സെന്റർ, മെയിൽ ഫീമെയിൽ വാർഡുകൾ, ഐസൊലേഷൻ വാർഡ് ആധുനിക നിലവാരത്തിലുള്ള ലേബർ റൂമുകളും ഓപ്പറേഷൻ തിയേറ്ററുകളും, ഐസിയു എന്നിവയാണ് കോന്നി താലൂക്ക് ആശുപത്രിയിൽ നിർമ്മിക്കുന്നത്.
ആശുപത്രിയിലേക്ക് ആവശ്യമായ ലിഫ്റ്റിന്റെ നിർമ്മാണ പ്രവർത്തികൾ വേഗത്തിൽ പൂർത്തീകരിക്കുവാൻ പൊതുമരാമത്ത് ഉദ്യോഗസ്ഥർക്ക് എംഎൽഎ നിർദ്ദേശം നൽകി.
കോന്നി താലൂക്ക് ആശുപത്രിയിൽ ചേർന്ന യോഗത്തിൽ എം എൽ എ യോടൊപ്പം ഡെപ്യൂട്ടി ഡി എം ഒ ഡോ. നന്ദിനി , ഡി പി എം ഡോ. ശ്രീകുമാർ, പൊതു മരാമത്ത് കെട്ടിട വിഭാഗം അസി. എക്സിക്യൂട്ടീവ് എൻജിനീയർ സുഭാഷ് , അസി എൻജിനീയർ ശ്രീജിത്ത്‌ , ആശുപത്രി സൂപ്രണ്ട് ഡോ. ഗ്രേസ് മറിയം,കരാർ കമ്പനി പ്രധിനിധികൾ എന്നിവർ പങ്കെടുത്തു.