ശബരിമല മകരവിളക്ക് തീര്‍ത്ഥാടനം:നട ഇന്ന്(30) തുറക്കും
കോന്നി വാര്‍ത്ത ഡോട്ട് കോം : മകരവിളക്ക് തീര്‍ത്ഥാടനത്തിനായി ഇന്ന് (30) വൈകിട്ട് അഞ്ചിന് ശബരിമല അയ്യപ്പക്ഷേത്ര നട തുറക്കും. മണ്ഡലപൂജയ്ക്ക് ശേഷം കഴിഞ്ഞ 26 ന് നട അടച്ചിരുന്നു. ഇന്ന് നട തുറക്കുമെങ്കിലും നാളെ (31) പുലര്‍ച്ചെമുതലേ തീര്‍ത്ഥാടകര്‍ക്ക് ദര്‍ശനത്തിന് അനുമതിയുള്ളൂ. ജനുവരി 14 നാണ് മകരവിളക്ക്. 19 വരെ തീര്‍ത്ഥാടകര്‍ക്ക് ദര്‍ശനത്തിന് അവസരമുണ്ടാകും.
കോവിഡ് നിയന്ത്രണങ്ങളില്‍ ഇളവ് വരുത്തിയ സാഹചര്യത്തില്‍ നാളെ മുതല്‍ കൂടുതല്‍ ഭക്തര്‍ ശബരിമലയിലെത്തുമെന്നാണ് കണക്കുകൂട്ടുന്നത്. അതേസമയം ദര്‍ശനത്തിനെത്തുന്നവര്‍ രണ്ട് ഡോസ് വാക്‌സിനും സ്വീകരിച്ച സര്‍ട്ടിഫിക്കറ്റ് കൂടെക്കരുതേണ്ടതാണ്. വാക്‌സിന്‍ എടുക്കാത്തവര്‍ ആര്‍ടിപിസിആര്‍ എടുക്കേണ്ടിവരും. നിലയ്ക്കലും എരുമേലിയിലും സ്‌പോട്ട് ബുക്കിംഗിന് അവസരമുണ്ട്.
ഒരു ഇടവേളയ്ക്കുശേഷം കാനന പാതയിലൂടെ വീണ്ടും തീര്‍ത്ഥാടകര്‍ക്ക് സഞ്ചരിക്കാനുള്ള അനുമതി നല്‍കിയിട്ടുണ്ട്. കാനന പാത സഞ്ചാരയോഗ്യമാക്കിക്കഴിഞ്ഞു. തീര്‍ത്ഥാടകര്‍ക്ക് ആവശ്യമായ സൗകര്യങ്ങള്‍ ഒരുക്കുന്നത് അവസാനഘട്ടത്തിലാണ്. ഇന്ന് എഡിഎം അര്‍ജ്ജുന്‍ പാണ്ഡ്യന്റെ നേതൃത്വത്തില്‍ ബന്ധപ്പെട്ട വകുപ്പുകളിലെ ഉദ്യോഗസ്ഥര്‍ കൂടി ഉള്‍പ്പെടുന്ന സംഘം ഈ പാതയില്‍ പരിശോധന നടത്തും. ശേഷം നാളെ മുതല്‍ തീര്‍ത്ഥാടകര്‍ക്കായി പാത തുറന്നുനല്‍കും.
കാനനപാതയില്‍ യാത്രാ സമയത്തിന് നിയന്ത്രണമുണ്ട്. കോഴിക്കാല്‍ക്കടവില്‍നിന്നും പുലര്‍ച്ചെ 5.30 നും 10.30 ഇടയിലേ കാനന പാതയിലേക്ക് തീര്‍ത്ഥാടകര്‍ക്ക് പ്രവേശനം അനുവദിക്കുകയുള്ളൂ. അഴുതക്കടവിലും മുക്കുഴിയിലും രാവിലെ ഏഴ് മുതല്‍ ഉച്ചയ്ക്ക് 12 വരെയാണ് പ്രവേശനം നല്‍കുക. ഈ മേഖലകളില്‍ ആവശ്യമായ രേഖകളുടെ പരിശോധനയും ഉണ്ടാകും. തീര്‍ത്ഥാടകര്‍ക്ക് കൂട്ടായും ഒറ്റയ്ക്കും വരാമെങ്കിലും ബാച്ചുകളായി മാത്രമേ കാനന പാതയിലൂടെ സന്നിധാനത്തേക്ക് പോകാന്‍ അനുവദിക്കൂ. വൈകിട്ട് അഞ്ചിന് ശേഷം കാനന പാതയിലൂടെ സഞ്ചാരം അനുവദിക്കില്ല.
വലിയാനവട്ടം, കരിമല, കല്ലിടാംകുന്ന് എന്നിവിടങ്ങളില്‍ തീര്‍ത്ഥാടകര്‍ക്ക് വിരി വയ്ക്കാന്‍ സൗകര്യമാരുക്കിയിട്ടുണ്ട്. വനം വകുപ്പിന്റെ എട്ട് ഇടത്താവളങ്ങളില്‍ കടകളും ലഘുഭക്ഷണശാലകളും ഒരുക്കിയിട്ടുണ്ട്. മുക്കുഴിയിലും കരിമലയിലും ആശുപത്രി സംവിധാനം ഒരുക്കിയിട്ടുണ്ട്. മാമ്പാടി, കല്ലിടാംകുന്ന്, കരിയിലാംതോട്, മഞ്ഞപ്പൊടിത്തട്ട് എന്നിവിടങ്ങളില്‍ ഓരോ എമര്‍ജന്‍സി മെഡിക്കല്‍ കെയര്‍ സെന്ററുകള്‍ പ്രവര്‍ത്തിക്കും.
മകരവിളക്ക് മഹോത്സവകാലത്തെത്തുന്ന തീര്‍ത്ഥാടകരെ സ്വീകരിക്കാനായി പമ്പ മുതല്‍ സന്നിധാനംവരെ ഒരുങ്ങിക്കഴിഞ്ഞു. ആഴിയും നെയ്‌തോണിയുമെല്ലാം ഫയര്‍ഫോഴ്‌സിന്റെയും വിശുദ്ധി സേനയുടെയും പരിശ്രമത്താല്‍ കഴുകി വൃത്തിയാക്കി. സന്നിധാനത്തിന്റെ പരിസരം വൃത്തിയായി സൂക്ഷിക്കാന്‍ വിശുദ്ധിസേനാംഗങ്ങളും അക്ഷീണം പണിയെടുക്കുന്നുണ്ട്. പമ്പ മുതല്‍ സന്നിധാനംവരെയുള്ള പാതയില്‍ ദേവസ്വം ബോര്‍ഡിന്റെ ഔഷധകുടിവെള്ള വിതരണമുണ്ടാകും. പാതയിലുടനീളം ജല അതോറിട്ടിയുടെ പ്പൈപ്പുകളിലൂടെയും കുടിവെള്ളം ലഭ്യമാണ്.