തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പിനോടനുബന്ധിച്ച് ജില്ലയിലെ രാഷ്ട്രീയ പാര്‍ട്ടികള്‍ക്കും സ്ഥാനാര്‍ഥികള്‍ക്കും പ്രവര്‍ത്തകര്‍ക്കും വോട്ടര്‍മാര്‍ക്കും ഹരിത ചട്ടങ്ങള്‍ പാലിക്കണമെന്ന ബോധവത്കരണം നല്‍കി കളക്ടറേറ്റില്‍ മാതൃകാ പോളിംഗ് ബൂത്ത് സജ്ജമായി.
ബൂത്തില്‍ എത്തുന്നവര്‍ക്ക് കോവിഡ് മാനദണ്ഡങ്ങള്‍ പാലിച്ച് വോട്ട് ചെയ്ത് മടങ്ങാം. കൂടാതെ പുതിയ വോട്ടര്‍മാര്‍ക്കുളള സംശയങ്ങള്‍ തീര്‍ക്കുകയും ചെയ്യാം. ജില്ലാ കളക്ടര്‍ പി.ബി നൂഹ് മാതൃകാ പോളിംഗ് ബൂത്തിന്റെ ഉദ്ഘാടനം നിര്‍വഹിച്ചു. ഉദ്ഘാടനത്തിനുശേഷം ജില്ലാ കളക്ടര്‍ ആദ്യ വോട്ട് രേഖപ്പെടുത്തി.
തദ്ദേശ തെരഞ്ഞെടുപ്പായതിനാല്‍ ഗ്രാമ-ബ്ലോക്ക്-ജില്ലാപഞ്ചായത്ത് തലങ്ങളില്‍ മൂന്ന് വോട്ടിംഗ് മെഷീനുകളില്‍ വോട്ട് രേഖപ്പെടുത്തേണ്ടതായുണ്ട്. തെരഞ്ഞെടുപ്പുമായി ബന്ധപ്പെട്ട് വോട്ടര്‍മാര്‍ക്ക് മാതൃകാ വോട്ട് രേഖപ്പെടുത്തുന്നതിനും പൊതുജനങ്ങള്‍ക്കും പുതിയ വോട്ടര്‍മാര്‍ക്കും സംശയങ്ങള്‍ പരിഹരിക്കുന്നതിനും മാതൃകാ ബൂത്തില്‍ സൗകര്യമുണ്ട്. ഇതിനായുള്ള ഉദ്യോഗസ്ഥരും ബൂത്തിലുണ്ട്.
ജില്ലാഭരണകേന്ദ്രത്തിന്റെയും ജില്ലാ ശുചിത്വമിഷന്റെയും ഹരിതകേരള മിഷന്റെയും നേതൃത്വത്തില്‍ പനമ്പ്, ഓല, മുള, ഈറ, പായ തുടങ്ങിയ പ്രകൃതി സൗഹൃദ വസ്തുക്കള്‍ ഉപയോഗിച്ചാണ് ഈ ഹരിത പോളിംഗ് ബൂത്ത് സജ്ജീകരിച്ചിരിക്കുന്നത്. ഹരിതചട്ടവുമായും കോവിഡുമായും ബന്ധപ്പെട്ട സന്ദേശങ്ങളും ബൂത്തില്‍ പ്രദര്‍ശിപ്പിച്ചിട്ടുണ്ട്. കണ്‍ട്രോള്‍ യൂണിറ്റ്, ബാലറ്റ് യൂണിറ്റ് എന്നിവയും ബൂത്തിലുണ്ട്.
തെരഞ്ഞെടുപ്പ് സംബന്ധിച്ച വോട്ടര്‍മാരുടെ സംശയങ്ങള്‍ പരിഹരിക്കുന്നതിന് സേവനസന്നദ്ധരായി ഉദ്യോഗസ്ഥരും ഈ ബൂത്തിലുണ്ട്.
തെരഞ്ഞെടുപ്പ് പ്രവര്‍ത്തനങ്ങളുടെ ഭാഗമായി രൂപപ്പെടാനിടയുള്ള മാലിന്യങ്ങളുടെ അളവ് പരമാവധി കുറയ്ക്കുകയും കഴിയുന്നിടത്തോളം പ്രകൃതി സൗഹൃദ വസ്തുക്കള്‍ തെരഞ്ഞെടുപ്പുമായി ബന്ധപ്പെട്ട എല്ലാ ആവശ്യങ്ങള്‍ക്കും ഉപയോഗിക്കുകയും ചെയ്യുന്നതിനെയാണ് ഹരിത തെരഞ്ഞെടുപ്പ് എന്നതിലൂടെ ഉദേശിക്കുന്നത്. തെരഞ്ഞെടുപ്പില്‍ പ്ലാസ്റ്റിക്ക് കലര്‍ന്ന പ്രചാരണ സാമിഗ്രികളും മറ്റ് വസ്തുക്കളും ഒഴിവാക്കുക, പ്രകൃതി സൗഹൃത വസ്തുക്കള്‍ പ്രചാരണത്തിന് ഉപയോഗിക്കുക തുടങ്ങിയ സന്ദേശങ്ങളും മാതൃകാ ഹരിത പോളിംഗ് ബൂത്തില്‍ പ്രദര്‍ശിപ്പിച്ചിട്ടുണ്ട്.
അസിസ്റ്റന്റ് കളക്ടര്‍ വി.ചെല്‍സാസിനി, ഇലക്ഷന്‍ ഡെപ്യൂട്ടി കളക്ടര്‍ വി.ഹരികുമാര്‍, ഡി.എം.ഒ (ആരോഗ്യം) ഡോ.എ.എല്‍ ഷീജ, ഹരിതതെരഞ്ഞെടുപ്പ് നോഡല്‍ഓഫീസറായ ശുചിത്വമിഷന്‍ ജില്ലാ കോ-ഓര്‍ഡിനേറ്റര്‍ കെ.ഇ.വിനോദ്കുമാര്‍, ഹരിതകേരളം മിഷന്‍ ജില്ലാ കോ-ഓര്‍ഡിനേറ്റര്‍ ആര്‍.രാജേഷ്, ജില്ലാ ഇന്‍ഫര്‍മേഷന്‍ ഓഫീസര്‍ സി.മണിലാല്‍, എ.ഡി.സി ജനറല്‍ വിമല്‍രാജ്, ശുചിത്വ മിഷന്‍ പ്രോഗ്രാം ഓഫീസര്‍ കെ.ആര്‍ അജയ്, ജൂനിയര്‍ സൂപ്രണ്ട് സിറോഷ് എന്നിവര്‍ പങ്കെടുത്തു.