കോന്നിവാര്‍ത്ത :കോന്നി താലൂക്ക് ആശുപത്രിയിൽ 10 കോടിയുടെ സമഗ്ര വികസന പദ്ധതിയുടെ ഉദ്ഘാടനം നവംബർ ഒന്നിന് ആരോഗ്യ വകുപ്പ് മന്ത്രി ഉദ്ഘാടനം ചെയ്യുമെന്ന് അഡ്വ.കെ.യു.ജനീഷ് കുമാർ എം.എൽ.എ അറിയിച്ചു. കോന്നി താലൂക്ക് ആശുപത്രിയുടെ സമഗ്രവികസനം മുൻനിർത്തി നിരവധി വികസന പ്രവർത്തനങ്ങളാണ് നടപ്പിലാക്കുന്നത്.
ആശുപത്രിയിൽ പുതിയ 5 നില കെട്ടിടം പദ്ധതിയുടെ ഭാഗമായി നിർമ്മിക്കും. നിലവിലുള്ള കാഷ്വാലിറ്റി കെട്ടിടത്തിൻ്റെ മുകളിലായാണ് 5 നില കെട്ടിടം നിർമ്മിക്കുന്നത്.ഇതോടെ കാഷ്വാലിറ്റി കെട്ടിടം ഏഴു നിലയായി മാറും.
പുതിയ കെട്ടിട നിർമ്മാണത്തിൻ്റെ ശിലാസ്ഥാപനവും ആരോഗ്യ മന്ത്രി നിർവ്വഹിക്കും.
പദ്ധതിയുടെ ഭാഗമായി പുതിയ വെൻ്റിലേറ്റർ സൗകര്യമുള്ള ഐ.സി.യു സൗകര്യം ക്രമീകരിക്കും.എം.എൽ.എ ഫണ്ടിൽ നിന്നും രണ്ട് വെൻ്റിലേറ്ററുകൾ ആശുപത്രിയിൽ എത്തിച്ചിട്ടുണ്ട്.ഐ.സി.യു ബെഡ്, മറ്റ് അനുബന്ധ സൗകര്യങ്ങൾ മുതലായവ എൽ.എച്ച്.എം ക്രമീകരിക്കും. വെൻ്റിലേറ്റർ സൗകര്യമുള്ള ഐ.സി.യു.വിൻ്റെ ഉദ്ഘാടനവും അന്നേ ദിവസം നിർവ്വഹിക്കും.
ഗൈനക്കോളജി വിഭാഗത്തിൽ ഡോക്ടർമാർ ഉണ്ടെങ്കിലും, ലേബർ റൂം ഇല്ലാത്തതിനാൽ ഡിപ്പാർട്ട്മെൻ്റിന് പ്രവർത്തിക്കാൻ കഴിയുന്നില്ല. ഇതിന് പരിഹാരമായി പുതിയ ലേബർ റൂം നിർമ്മിക്കും.
പുതിയ ഓപ്പറേഷൻ തീയറ്ററും പദ്ധതിയുടെ ഭാഗമായി നിർമ്മിക്കും. വൃക്കരോഗികൾക്ക് ചികിത്സയ്ക്ക് കോന്നിയിൽ നിലവിൽ സൗകര്യമില്ല.അതിനായി ഡയാലിസിസ് യൂണിറ്റ് താലൂക്ക് ആശുപത്രിയിൽ ആരംഭിക്കും.
താലൂക്ക് ആശുപത്രിയ്ക്ക് ഇതുവരെ സ്വന്തമായി ആംബുലൻസില്ല. 108 ആംബുലൻസ് ആശുപത്രിയിൽ കിടക്കുന്നുണ്ട് എങ്കിലും ആശുപത്രി സൂപ്രണ്ടിൻ്റെ ചുമതലയിലല്ല.
എം.എൽ.എ ഫണ്ടിൽ നിന്നും പദ്ധതിയുടെ ഭാഗമായി താലൂക്ക് ആശുപത്രിക്ക് ആംബുലൻസ് നല്കും.
എല്ലാവിധ അത്യാധുനിക സൗകര്യവുമുള്ള ആംബുലൻസ് ആണ് നല്കുക. ആംബുലൻസിൻ്റെ രജിസ്ട്രേഷൻ നടപടികൾ നടന്നുവരുന്നു.
നവംബർ ഒന്ന് ഞായറാഴ്ച പകൽ 12 മണിക്കാണ് ആരോഗ്യ മന്ത്രി പദ്ധതിയുടെ ഉദ്ഘാടനം നിർവ്വഹിക്കുന്നത്.കെ.യു.ജനീഷ് കുമാർ എം.എൽ.എ അദ്ധ്യക്ഷത വഹിക്കും. ആൻ്റോ ആൻ്റണി എം.പി., പൊതുമരാമത്ത് കെട്ടിടവിഭാഗം ചീഫ് എഞ്ചിനീയർ ഹൈജിൻ ആൽബർട്ട്, ബ്ബോക്ക് പഞ്ചായത്ത് പ്രസിഡൻ്റ് കോന്നിയൂർ പി.കെ, ഗ്രാമ പഞ്ചായത്ത് പ്രസിഡൻ്റ് എം.രജനി, ജില്ലാ പഞ്ചായത്തംഗം എലിസബത്ത് അബു,ജില്ലാ മെഡിക്കൽ ഓഫീസർ എ.എൽ.ഷീജ, എൻ.എച്ച്.എം ജില്ലാ പ്രോഗ്രാം മാനേജർ ഡോ: എബി സുഷൻ, ലീലാ രാജൻ, പി.ഗീത, ശ്യാംലാൽ, ഡോ: എം.റ്റി.സിമി തുടങ്ങിയവർ പ്രസംഗിക്കും.