കോന്നി വാര്‍ത്ത ഡോട്ട് കോം : ഇന്ന് വെളുപ്പിനെ വനപാലകര്‍ ഒരുക്കിയ കെണിയില്‍ വീണ പുലിയെ കക്കി വനത്തില്‍ തുറന്നു വിട്ടു . സീതത്തോട് ആങ്ങമൂഴി മേഖലയിൽ നാട്ടിലിറങ്ങിയ പുലിയാണ് വനപാലകർ സ്ഥാപിച്ച കെണിയില്‍ അകപ്പെട്ടത് . പുലിയുടെ സ്ഥിരം സാന്നിദ്ധ്യം ശ്രദ്ധയിൽ പ്പെട്ടതോടെയാണ് അളിയൻ മുക്ക് പ്രദേശത്ത് കൂടുവച്ചത്. ഒരാഴ്ച മുമ്പ് വച്ച കൂട്ടിൽ കഴിഞ്ഞ 3 ദിവസമായി ഇരയെ ഇട്ടിരുന്നു. കഴിഞ്ഞ ദിവസം രാത്രി കൂട്ടിലകപ്പെട്ട പുലിയെ ഇന്നലെ രാവിലെ വനം വകുപ്പുദ്യോഗസ്ഥരെത്തി കക്കി വനമേഖലയിൽ തുറന്നുവിട്ടു .
കഴിഞ്ഞ 3 മാസങ്ങളായി ആങ്ങമൂഴി മേഖലയിൽ ജനവാസ മേഖലകളിൽ ഭീതിപരത്തിയ വന്യമൃഗമാണ് ഇത്. 8 ഓളം വളർത്തു നായകളെയും, നിരവധി മറ്റു വളർത്തു ജീവികളെയും ആക്രമിച്ചു. സന്ധ്യകഴിഞ്ഞ് ജനങ്ങൾ വീടിനുള്ളിൽ തന്നെ കഴിഞ്ഞു കൂടുകയായിരുന്നു. ഉരുൾ പൊട്ടൽ ഭീഷണി നേരിടുന്ന ആങ്ങമൂഴി മേഖലയിൽ വന്യമൃഗങ്ങളുടെ ശല്യവും രൂക്ഷമാണ്. സ്ഥിരം നാട്ടിലിറങ്ങുന്ന കാട്ടാനയാണ് മറ്റൊരു ആശങ്ക. വന്യമൃഗം ശല്യം തടയാൻ നിരവധി അഭ്യർത്ഥനകൾ നൽകിയിട്ടും വനപാലകർ നടപടികൾ സ്വീകരിച്ചിരുന്നില്ല എന്ന പരാതി ഉയർന്നിരുന്നു.
കഴിഞ്ഞ ദിവസം കെണിയിൽ വീണ പുലിയെ ഗവി വനമേഖലയിലാണ് തുറന്നു വിട്ടിരിക്കുന്നത്. എന്നാൽ ഈ പ്രദേശം വന്യമൃഗങ്ങളെ സംബന്ധിച്ച് തിരിച്ചെത്താനാകാത്ത വിധം ദൂരെയല്ല. ഒരിക്കൽ ജനവാസ മേഖലയിൽ സ്ഥിര സാന്നിദ്ധ്യമായ പുലി തിരിച്ചെത്തുമെന്ന ആശങ്കയിലാണ് നാട്ടുകാർ.