എക്സിറ്റ് പോളുകൾക്കും സർവേ ഫലങ്ങൾക്കും വിലക്കേർപ്പെടുത്തി കേന്ദ്ര തെരഞ്ഞെടുപ്പ് കമീഷൻ. മാർച്ച്‌ 27 രാവിലെ 7 മണിമുതൽ ഏപ്രിൽ 29 വൈകീട്ട്‌ 7:30 വരെയാണ്‌ വിലക്കേർപ്പെടുത്തിയിട്ടുള്ളത്‌. തെരഞ്ഞെടുപ്പ് ഫലം സംബന്ധിച്ച് ദൃശ്യ, പത്ര മാധ്യമങ്ങൾ പ്രവചനങ്ങളും സർവേകളും തുടരുന്ന സാഹചര്യത്തിലാണ്‌ കമീഷന്റെ അറിയിപ്പ്‌. ജനപ്രാധിനിത്യ നിയമത്തിലെ സെക്ഷൻ 126(1)(b) ലംഘിക്കുന്നതായി കണ്ടെത്തിയതിനെത്തുടർന്നാണ്‌ തെരഞ്ഞെടുപ്പ് കമീഷൻ കുറിപ്പ്‌ പുറത്തിറക്കിയത്
നിയമസഭാ തെരഞ്ഞെടുപ്പ്;വോട്ടെടുപ്പ് സമാപനത്തിന് 48 മണിക്കൂര്‍ സമയപരിധിയില്‍
തെരഞ്ഞെടുപ്പ് വിഷയം പ്രദര്‍ശിപ്പിക്കുന്നത് നിരോധിച്ചു
നിയമസഭാ തെരഞ്ഞെടുപ്പുമായി ബന്ധപ്പെട്ട് ഓരോ നിയോജകമണ്ഡലത്തിലേയും വോട്ടെടുപ്പ് സമാപിക്കുന്നതിന് 48 മണിക്കൂര്‍ സമയപരിധിയില്‍ ഏതെങ്കിലും തെരഞ്ഞെടുപ്പ് വിഷയം ടെലിവിഷന്‍ അല്ലെങ്കില്‍ സമാന മാധ്യമങ്ങളിലൂടെ പ്രദര്‍ശിപ്പിക്കുന്നത് നിരോധിക്കണമെന്ന് കേന്ദ്ര തെരഞ്ഞെടുപ്പ് കമ്മീഷന്‍ നിര്‍ദേശം നല്‍കി. 1951 ലെ ജനപ്രാതിനിധ്യ നിയമം 126-ാം സെക്ഷന്‍ പ്രകാരമുള്ള മാര്‍ഗനിര്‍ദേശങ്ങള്‍ മാധ്യമങ്ങള്‍ പാലിക്കണമെന്നും തെരഞ്ഞെടുപ്പ് കമ്മീഷന്‍ നിര്‍ദേശം നല്‍കി.
സെക്ഷന്‍ 126 പ്രകാരം വീഡിയോ, ടെലിവിഷന്‍ അല്ലെങ്കില്‍ മറ്റ് സമാന ഉപകരണങ്ങള്‍ ഉപയോഗിച്ച് തെരഞ്ഞെടുപ്പുമായി ബന്ധപ്പെട്ടതോ തെരഞ്ഞെടുപ്പ് ഫലത്തിനെ സ്വാധീനിക്കാന്‍ കഴിയുന്നതോ ആയ കാര്യങ്ങള്‍ പൊതുജനങ്ങളില്‍ എത്തിക്കാന്‍ പാടില്ല. നിയമ ലംഘനം ഉണ്ടായാല്‍ ശിക്ഷാ നടപടികള്‍ സ്വീകരിക്കും. സെക്ഷന്‍ 126 ല്‍ പരാമര്‍ശിച്ചിരിക്കുന്ന 48 മണിക്കൂര്‍ കാലയളവില്‍ ടിവി, റേഡിയോ, ചാനല്‍, കേബിള്‍ നെറ്റ്വര്‍ക്കുകള്‍, ഇന്റര്‍നെറ്റ് വെബ്സൈറ്റ്, സോഷ്യല്‍ മീഡിയ പ്ലാറ്റ്ഫോമുകള്‍ അവര്‍ സംപ്രേഷണം ചെയ്യുന്ന അല്ലെങ്കില്‍ പ്രക്ഷേപണം ചെയ്യുന്നതോ പ്രദര്‍ശിപ്പിക്കുന്നതോ ആയ പ്രോഗ്രാമുകളുടെ ഉള്ളടക്കങ്ങള്‍ ഏതെങ്കിലും പ്രത്യേക കക്ഷിയുടെയോ സ്ഥാനാര്‍ത്ഥിയുടെയോ പ്രതീക്ഷകളെ പ്രോത്സാഹിപ്പിക്കുന്നതോ മുന്‍വിധിയോടെയുള്ളതോ അല്ലെങ്കില്‍ തെരഞ്ഞെടുപ്പ് ഫലത്തെ സ്വാധീനിക്കുന്നതോ ബാധിക്കുന്നതോ ആയി കണക്കാക്കാവുന്ന പാനലിസ്റ്റുകള്‍, വ്യക്തിഗത കാഴ്ചകള്‍, അപ്പീലുകള്‍ ഉള്‍പ്പെടെ ഏതെങ്കിലും വസ്തുക്കള്‍ ഉണ്ടാകാന്‍ പാടില്ല.
അഭിപ്രായ സര്‍വേകള്‍, സംവാദങ്ങള്‍, വിശകലനം, വിഷ്വലുകള്‍, ശബ്ദ ബൈറ്റുകള്‍ എന്നിവയുടെ പ്രദര്‍ശനം എന്നിവയും ഇതില്‍ ഉള്‍പ്പെടുന്നു. തെരഞ്ഞെടുപ്പുമായി ബന്ധപ്പെട്ട് 48 മണിക്കൂറിനു മുന്‍പ് (126-ാം വകുപ്പില്‍ ഉള്‍പ്പെടാത്ത കാലയളവില്‍) ബന്ധപ്പെട്ട ടിവി, റേഡിയോ, കേബിള്‍, എഫ്എം ചാനലുകള്‍, ഇന്റര്‍നെറ്റ് വെബ്സൈറ്റുകള്‍, സോഷ്യല്‍ മീഡിയ പ്ലാറ്റ്ഫോമുകള്‍ എന്നിവയ്ക്ക് എക്സിറ്റ് പോള്‍ ഒഴികെയുള്ള പ്രക്ഷേപണ, ടെലികാസ്റ്റ് അനുബന്ധ പരിപാടികള്‍ നടത്തുന്നതിന് ആവശ്യമായ അനുമതിക്കായി സംസ്ഥാന, ജില്ലാ പ്രാദേശിക അധികാരികളെ സമീപിക്കാന്‍ സ്വാതന്ത്ര്യമുണ്ട്. മാന്യമായ പെരുമാറ്റച്ചട്ടം, കേബിള്‍ നെറ്റ്വര്‍ക്ക് (റെഗുലേഷന്‍) നിയമപ്രകാരം വിവര, പ്രക്ഷേപണ മന്ത്രാലയം നിര്‍ദ്ദേശിച്ച പ്രോഗ്രാം കോഡ്, പെരുമാറ്റച്ചട്ടത്തിലെ വ്യവസ്ഥകള്‍ക്കും അനുസൃതമായിരിക്കണം ഉള്ളടക്കം.
എല്ലാ ഇന്റര്‍നെറ്റ് വെബ്സൈറ്റുകളും സോഷ്യല്‍ മീഡിയ പ്ലാറ്റ്ഫോമുകളും ഇന്‍ഫര്‍മേഷന്‍ ടെക്നോളജി ആക്റ്റ് തുടങ്ങിയവ നിര്‍ദേശിക്കുന്ന നിയമങ്ങള്‍ പാലിക്കണം. രാഷ്ട്രീയ പരസ്യങ്ങള്‍ക്ക് കമ്മീഷന്റെ ഉത്തരവ് പ്രകാരം സംസ്ഥാന, ജില്ലാ തലത്തില്‍ രൂപീകരിച്ച കമ്മിറ്റികളുടെ പ്രീ-സര്ട്ടിഫിക്കേഷന് ആവശ്യമാണ്.
പ്രസ് കൗണ്‍സില്‍ ഓഫ് ഇന്ത്യയുടെ മാര്‍ഗനിര്‍ദേശപ്രകാരം ഏതെങ്കിലും സ്ഥാനാര്‍ത്ഥിയുടെ വ്യക്തിപരമായ സ്വഭാവവും പെരുമാറ്റവും സംബന്ധിച്ചോ ഏതെങ്കിലും സ്ഥാനാര്‍ത്ഥിയുടെ സ്ഥാനാര്‍ത്ഥിത്വം അല്ലെങ്കില്‍ പിന്‍വലിക്കലുമായി ബന്ധപ്പെട്ടോ തെറ്റായ, വിമര്‍ശനാത്മക പ്രസ്താവനകള്‍ പത്രങ്ങള്‍ പ്രസിദ്ധീകരിക്കുന്നതില്‍ നിന്ന് വിട്ടുനില്‍ക്കണം. ഒരു സ്ഥാനാര്‍ഥിക്കും പാര്‍ട്ടിക്കുമെതിരെ സ്ഥിരീകരിക്കാത്ത ആരോപണങ്ങള്‍ പത്രങ്ങള്‍ പ്രസിദ്ധീകരിക്കരുത്. അധികാരത്തിലിരിക്കുന്ന ഒരു പാര്‍ട്ടിയുടെയോ സര്‍ക്കാരിന്റെയോ നേട്ടങ്ങള്‍ സംബന്ധിച്ച് പൊതു ഖജനാവില്‍ നിന്ന് പത്രങ്ങള്‍ ഒരു പരസ്യവും സ്വീകരിക്കുകയോ പ്രസിദ്ധീകരിക്കുകയോ ചെയ്യരുത്. തെരഞ്ഞെടുപ്പ് കമ്മീഷന്‍, റിട്ടേണിംഗ് ഓഫീസര്‍മാര്‍ അല്ലെങ്കില്‍ ചീഫ് ഇലക്ടറല്‍ ഓഫീസര്‍മാരുടെ എല്ലാ നിര്‍ദ്ദേശങ്ങളും ഉത്തരവുകളും നിര്‍ദ്ദേശങ്ങളും പ്രസ് നിരീക്ഷിക്കുകയും വേണം എന്നും നിര്‍ദേശത്തില്‍ സൂചിപ്പിച്ചിട്ടുണ്ട്.
ഒരു പാര്‍ട്ടിയുമായോ സ്ഥാനാര്‍ത്ഥിയുമായോ ഏതെങ്കിലും രാഷ്ട്രീയ ബന്ധങ്ങള്‍ ഉണ്ടെങ്കില്‍ വാര്‍ത്താ ചാനലുകള്‍ അവ വെളിപ്പെടുത്തണം. ഒരു പ്രത്യേക പാര്‍ട്ടിയെയോ സ്ഥാനാര്‍ത്ഥിയെയോ അവര്‍ പരസ്യമായി അംഗീകരിക്കുകയോ പിന്തുണയ്ക്കുകയോ ചെയ്തില്ലെങ്കില്‍, തെരഞ്ഞെടുപ്പ് റിപ്പോര്‍ട്ടിംഗില്‍ വാര്‍ത്താ പ്രക്ഷേപകര്‍ സന്തുലിതവും നിഷ്പക്ഷവുമായി പ്രവര്‍ത്തിക്കണം. തെരഞ്ഞെടുപ്പ് കവറേജിനെയും തെരഞ്ഞെടുപ്പുമായി ബന്ധപ്പെട്ട കാര്യങ്ങളെയും ബാധിച്ചേക്കാവുന്ന എല്ലാ രാഷ്ട്രീയ, സാമ്പത്തിക സമ്മര്‍ദ്ദങ്ങളെയും വാര്‍ത്താ പ്രക്ഷേപകര്‍ ചെറുക്കണം.
വാര്‍ത്താ പ്രക്ഷേപകര്‍, അവരുടെ പത്രപ്രവര്‍ത്തകര്‍, ഉദ്യോഗസ്ഥര്‍ എന്നിവര്‍ പണമോ വിലയേറിയ സമ്മാനങ്ങളോ, സ്വാധീനിക്കാന്‍ തോന്നുന്ന ഏതെങ്കിലും പ്രീതി സ്വീകരിക്കുകയോ, അനിയന്ത്രിതമായ ഒരു സംഘട്ടനം സൃഷ്ടിക്കുകയോ ബ്രോഡ്കാസ്റ്ററുടെയോ അവരുടെ ഉദ്യോഗസ്ഥരുടെയോ വിശ്വാസ്യതയെ തകര്‍ക്കുകയോ ചെയ്യരുത്.
വോട്ടിംഗ് പ്രക്രിയ, എങ്ങനെ, എപ്പോള്‍, എവിടെ വോട്ട് ചെയ്യണം, വോട്ടിന് രജിസ്റ്റര്‍ ചെയ്യേണ്ടത്, ബാലറ്റിന്റെ രഹസ്യസ്വഭാവം എന്നിവ ഉള്‍പ്പെടെ വോട്ടര്‍മാരെ ഫലപ്രദമായി അറിയിക്കുന്നതിന് പ്രക്ഷേപകര്‍ വോട്ടര്‍ വിദ്യാഭ്യാസ പരിപാടികള്‍ നടത്തണം തുടങ്ങിയവയാണ് എന്‍ബിഎസ്എയുടെ തെരഞ്ഞെടുപ്പ് പ്രക്ഷേപണത്തിനുള്ള മാര്‍ഗനിര്‍ദ്ദേശങ്ങളില്‍ പറഞ്ഞിട്ടുള്ളത്.
തെരഞ്ഞെടുപ്പ് പരസ്യങ്ങള്‍ക്ക്
മുന്‍കൂര്‍ അനുമതി നേടണം
തെരഞ്ഞെടുപ്പുമായി ബന്ധപ്പെട്ട് സ്ഥാനാര്‍ഥികളും രാഷ്ട്രീയപാര്‍ട്ടികളും കേബിള്‍-ടിവി ചാനലുകള്‍, റേഡിയോ, സോഷ്യല്‍ മീഡിയ, ഇ-ന്യൂസ് പേപ്പര്‍, ബള്‍ക്ക് എസ്എംഎസ്, വോയ്‌സ് മെസേജ് എന്നിവ അടക്കമുള്ള ഇലക്‌ട്രോണിക് മാധ്യമങ്ങളും സിനിമാ തീയറ്ററുകളും വഴി പരസ്യങ്ങള്‍ സംപ്രേഷണം/പ്രക്ഷേപണം ചെയ്യുന്നതിനും പൊതുസ്ഥലങ്ങളില്‍ ശ്രവ്യ-ദൃശ്യ പരസ്യങ്ങള്‍ പ്രദര്‍ശിപ്പിക്കുന്നതിനും പത്തനംതിട്ട ജില്ലാ തെരഞ്ഞെടുപ്പ് ഓഫീസര്‍(ജില്ലാ കളക്ടര്‍) ചെയര്‍മാനായ ജില്ലാതല മീഡിയ സര്ട്ടിഫിക്കേഷന് ആന്‍ഡ് മോണിറ്ററിംഗ് കമ്മിറ്റി (എംസിഎംസി)യുടെ സര്ട്ടിഫിക്കേഷന് (പ്രീ സര്ട്ടിഫിക്കേഷന്) നിര്‍ബന്ധമാണ്.
എംസിഎംസി ജില്ലാതല കമ്മിറ്റിയാണ് പ്രീ സര്‍ട്ടിഫിക്കേഷനുള്ള അപേക്ഷ സ്വീകരിക്കുന്നതും സര്‍ട്ടിഫിക്കറ്റ് നല്‍കുന്നതും.
തെരഞ്ഞെടുപ്പിന്റെ തലേദിവസവും(2021 ഏപ്രില്‍ 5) തെരഞ്ഞെടുപ്പു ദിവസവും(ഏപ്രില്‍ 6) പത്രമാധ്യമങ്ങളില്‍ പരസ്യം പ്രസിദ്ധീകരിക്കുന്നതിന് എംസിഎംസി സര്ട്ടിഫിക്കേഷന് നിര്‍ബന്ധമാണ്. തെരഞ്ഞെടുപ്പിന്റെ തലേദിവസവും തെരഞ്ഞെടുപ്പ് ദിവസവും മാത്രമാണ് പത്ര പരസ്യങ്ങള്‍ക്ക് പ്രീ സര്ട്ടിഫിക്കേഷന് വേണ്ടത്.
അപേക്ഷ നല്‍കുന്നതെങ്ങനെ?
പരസ്യം പ്രസിദ്ധീകരിക്കാന്‍ ഉദ്ദേശിക്കുന്ന തീയതിക്ക് 24 മണിക്കൂര്‍ മുമ്പ് അപേക്ഷ നല്‍കിയാണ് സര്ട്ടിഫിക്കേഷന് നേടേണ്ടത്. പത്തനംതിട്ട കളക്ടറേറ്റിലെ ഒന്നാം നിലയില്‍ പ്രവര്‍ത്തിക്കുന്ന എംസിഎംസി ജില്ലാ സെല്ലിലാണ് (ജില്ലാ ഇന്‍ഫര്‍മേഷന്‍ ഓഫീസ്) അപേക്ഷ നല്‍കേണ്ടത്. സര്ട്ടിഫിക്കേഷന് നിര്‍ദിഷ്ട മാതൃകയിലുള്ള അപേക്ഷയാണു നല്‍കേണ്ടത്. വീഡിയോകള്‍ക്കും വോയ്‌സ് മെസേജിനും ഓഡിയോ മെസേജിനും സര്‍ട്ടിഫിക്കേഷനായി സ്‌ക്രിപ്റ്റിന്റെ സ്വയം സാക്ഷ്യപ്പെടുത്തിയ രണ്ട് പകര്‍പ്പ്, വീഡിയോ/ഓഡിയോ ഉള്‍പ്പെടുന്ന രണ്ട് സിഡി എന്നിവ സഹിതമാണ് അപേക്ഷ നല്‍കേണ്ടത്. എസ്എംഎസിന് സ്‌ക്രിപ്റ്റിന്റെ സാക്ഷ്യപ്പെടുത്തിയ രണ്ടു പകര്‍പ്പ് സഹിതമാണ് അപേക്ഷ നല്‍കേണ്ടത്.
തെരഞ്ഞെടുപ്പിന്റെ തലേദിവസവും(ഏപ്രില്‍ 5) തെരഞ്ഞെടുപ്പു ദിവസവും(ഏപ്രില്‍ 6) പത്രങ്ങളില്‍ പ്രസിദ്ധീകരിക്കാന്‍ ഉദ്ദേശിക്കുന്ന പരസ്യത്തിന്റെ സ്വയംസാക്ഷ്യപ്പെടുത്തിയ രണ്ട് കോപ്പി സഹിതമാണ് അപേക്ഷ നല്‍കേണ്ടത്. ഇവ പരിശോധിച്ചാണ് എംസിഎംസി ജില്ലാസെല്‍ അനുമതി നല്‍കുക. മാതൃകാ പെരുമാറ്റച്ചട്ടലംഘനം പരസ്യത്തില്‍ കണ്ടെത്തിയാല്‍ മാറ്റങ്ങള്‍ വരുത്തി വീണ്ടും നല്‍കുന്നതിനു രേഖാമൂലം നിര്‍ദേശം നല്‍കും. മാറ്റങ്ങള്‍ വരുത്തി നല്‍കിയവ വീണ്ടും പരിശോധിച്ചാണ് അനുമതി നല്‍കുക.
പൊതുയോഗങ്ങള്‍ക്ക് മുന്‍കൂര്‍ അനുമതി നിര്‍ബന്ധം
സ്ഥാനാര്‍ഥിയോ രാഷ്ട്രീയ പാര്‍ട്ടിയോ തെരഞ്ഞെടുപ്പ് പ്രചാരണത്തിനായി പൊതുയോഗങ്ങള്‍ സംഘടിപ്പിക്കുന്നതിന് മുന്‍കൂര്‍ അനുമതി വാങ്ങേണ്ടതാണ്. തെരഞ്ഞെടുപ്പ് കമ്മീഷന്റെ സുവിധ പോര്‍ട്ടല്‍ വഴി അനുമതിക്ക് അപേക്ഷിക്കാം.
ഇത്തവണ കോവിഡ്-19 പ്രോട്ടോക്കോള്‍ പാലിക്കേണ്ടതിനാല്‍ പൊതുയോഗങ്ങള്‍ നടത്തുന്നതിന് മൈതാനങ്ങള്‍ അനുവദിച്ച് ജില്ലാ തെരഞ്ഞെടുപ്പ് ഓഫീസര്‍ ഉത്തരവിറക്കിയിട്ടുണ്ട്. ഈ മൈതാനങ്ങളിലല്ലാതെ പ്രചാരണ പരിപാടികള്‍ സംഘടിപ്പിക്കാന്‍ അനുവദിക്കില്ല. കോര്‍ണര്‍ യോഗങ്ങള്‍ അനുവദിക്കില്ല. പൊതുയോഗങ്ങളില്‍ കോവിഡ് മാനദണ്ഡങ്ങള്‍ നിര്‍ബന്ധമായി പാലിക്കേണ്ടതാണ്. മൈക്ക് അനുമതി, പ്രചാരണത്തിന് വാഹനങ്ങള്‍ ഉപയോഗിക്കുന്നതിനുള്ള അനുമതി എന്നിവയും നിര്‍ബന്ധമാണ്.
രാത്രി 10 നും രാവിലെ ആറിനും ഇടയില്‍ മൈക്ക് ഉപയോഗിക്കാനും പാടില്ല. വാഹന പെര്‍മിറ്റിന്റെ ഒറിജിനല്‍ വിന്‍ഡ് സ്‌ക്രീനില്‍ വ്യക്തമായി കാണുംവിധം പതിക്കണം. ഹെലികോപ്റ്റര്‍ ഇറങ്ങുന്നതിന് മൂന്ന് ദിവസം മുമ്പ് ജില്ലാ കളക്ടറെ അറിയിക്കണം. ഹെലികോപ്റ്റര്‍ ഇറക്കുന്നതിന് മുന്‍കൂര്‍ അനുമതി വാങ്ങണം.
തെരഞ്ഞെടുപ്പ്: പെര്‍മിറ്റുകള്‍ സുവിധ ആപ്പിലൂടെ
നിയമസഭ തെരഞ്ഞെടുപ്പുമായി ബന്ധപ്പെട്ട് രാഷ്ട്രീയ കക്ഷികള്‍, സ്ഥാനാര്‍ത്ഥികള്‍ എന്നിവര്‍ക്ക് വാഹന പെര്‍മിറ്റ്, ഉച്ചഭാഷിണി, റാലി, പൊതുയോഗം, താല്‍ക്കാലിക തെരഞ്ഞെടുപ്പ് ഓഫീസ് എന്നിവയ്ക്കായി suvidha.eci.gov.in എന്ന വെബ്സൈറ്റ് മുഖേന അപേക്ഷ ഓണ്‍ലൈനായി സമര്‍പ്പിക്കണം. പോലീസില്‍ നിന്നുള്ള നിരാക്ഷേപപത്രം ലഭിക്കുന്നത് സംബന്ധിച്ച പരാതിയുള്ള പക്ഷം പോലീസ് നോഡല്‍ ഓഫീസര്‍മാരെ ബന്ധപ്പെടാം.