പട്ടികജാതി-പട്ടികവര്‍ഗ വിഭാഗങ്ങളുടെ അടിസ്ഥാനസൗകര്യവികസനത്തിന്
പ്രഥമ പരിഗണന : ഡെപ്യൂട്ടി സ്പീക്കര്‍
പട്ടികജാതി -പട്ടികവര്‍ഗ വിഭാഗങ്ങളുടെ അടിസ്ഥാനസൗകര്യവികസനത്തിനും വിദ്യാഭ്യാസ-സാമ്പത്തിക പുരോഗതിക്കുമുള്ള പദ്ധതികളാണ് സര്‍ക്കാര്‍ നടപ്പാക്കുന്നതെന്ന് ഡെപ്യൂട്ടി സ്പീക്കര്‍ ചിറ്റയം ഗോപകുമാര്‍. കലക്ടറേറ്റ് കോണ്‍ഫറന്‍സ് ഹാളില്‍ ചേര്‍ന്ന പട്ടികജാതി -പട്ടികവര്‍ഗ വികസനസമിതി യോഗത്തില്‍ പദ്ധതി പുരോഗതി വിലയിരുത്തുകയായിരുന്നു അദ്ദേഹം.
പ്രവൃത്തികള്‍ സമയബന്ധിതമായി പൂര്‍ത്തിയാക്കാന്‍ ഉദ്യോഗസ്ഥര്‍ ശ്രദ്ധിക്കണം. മുന്‍ വര്‍ഷങ്ങളിലെ പദ്ധതികളില്‍ പൂര്‍ത്തിയാകാനുള്ളവയ്ക്ക് പ്രത്യേക പരിഗണന നല്‍കണം.
നടപ്പ് സാമ്പത്തികവര്‍ഷത്തെ കോര്‍പ്പസ് ഫണ്ടില്‍ ഉള്‍പ്പെടുത്തി പട്ടികവര്‍ഗ വികസനത്തിനായി നടപ്പാക്കുന്ന ആറ് പദ്ധികള്‍ക്ക് അംഗീകാരം നല്‍കി. പട്ടികവര്‍ഗ കുടുംബങ്ങള്‍ക്ക് സ്വയംതൊഴില്‍ ചെയ്യുന്നതിനുള്ള പശുവളര്‍ത്തല്‍ പദ്ധതി, അത്ലറ്റിക് മത്സരങ്ങളില്‍ പങ്കെടുക്കുന്നതിന് സ്പോര്‍ട്‌സ് സാമഗ്രികള്‍ വാങ്ങുന്നതിനുള്ള പദ്ധതി, മൂഴിയാര്‍ പട്ടികവര്‍ഗ ഉന്നതിയില്‍ താല്‍ക്കാലിക പഠനമുറി നിര്‍മാണം തുടങ്ങിയവയ്ക്കാണ് അംഗീകാരം നല്‍കിയത്.
പട്ടികജാതി വികസനത്തിനായുള്ള അഞ്ച് പദ്ധതികള്‍ക്കും അംഗീകാരം നല്‍കി – വട്ടാറുകയം നഗര്‍ സംരക്ഷണഭിത്തി നിര്‍മാണം, വടശ്ശേരിക്കര ഗ്രാമപഞ്ചായത്ത് ഹരിജന്‍ നഗറിലെ റോഡ് കോണ്‍ക്രീറ്റിംഗ്, വലിയാട്ടുകുളം നാല് സെന്റ് നഗര്‍ റോഡ് കോണ്‍ക്രീറ്റിംഗ്, പുന്നരകുളഞ്ഞി ലക്ഷം വീട് കൈവരി നിര്‍മാണം, സ്റ്റെപ്പ് നിര്‍മാണം.വിവിധ ബ്ലോക്കുകളിലായി ഒമ്പത് വിജ്ഞാനവാടികളുടെ ഭൗതികസാഹചര്യം മെച്ചപ്പെടുത്തുന്നതിനുള്ള പദ്ധതികള്‍ക്കും അംഗീകാരം നല്‍കി. അംബേദ്ക്കര്‍ സ്വാശ്രയഗ്രാമം പദ്ധതിയുടെ പുരോഗതിയും അവലോകനം ചെയ്തു.ജില്ലാ പഞ്ചായത്ത് പ്രസിഡന്റിന്റെ ചുമതലയുള്ള ബീന പ്രഭ അധ്യക്ഷയായി.
ജില്ലാ കലക്ടര്‍ എസ്. പ്രേം കൃഷ്ണന്‍, ജില്ലാ പ്ലാനിംഗ് ഓഫീസര്‍ എ. എസ്. മായ, സമിതി അംഗങ്ങള്‍, ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.
പാലിയേറ്റീവ് രോഗീ ബന്ധു സംഗമം
വെച്ചൂച്ചിറ ഗ്രാമപഞ്ചായത്ത്, സാമൂഹിക ആരോഗ്യ കേന്ദ്രം, റാന്നി ബ്ലോക്ക് പഞ്ചായത്ത് എന്നിവയുടെ സംയുക്താഭിമുഖ്യത്തില്‍ പാലിയേറ്റീവ് രോഗീ ബന്ധു സംഗമവും കലാപരിപാടികളും നടത്തി. റാന്നി ബ്ലോക്ക് പഞ്ചായത്ത് പ്രസിഡന്റ് കെ എസ് ഗോപി ഉദ്ഘാടനം നിര്‍വഹിച്ചു. വെച്ചൂച്ചിറ ഗ്രാമപഞ്ചായത്ത് പ്രസിഡന്റ് ടി.കെ.ജയിംസ് അധ്യക്ഷനായി. പാലിയേറ്റീവ് രോഗികള്‍ക്കുള്ള കിറ്റ് വിതരണം പഴവങ്ങാടി പഞ്ചായത്ത് പ്രസിഡന്റ് റൂബി കോശി നിര്‍വഹിച്ചു. പാലിയേറ്റീവ് നഴ്‌സുമാര്‍, ടീം അംഗങ്ങള്‍, ആബുലന്‍സ് ഡ്രൈവര്‍ എന്നിവരെ നാറാണംമൂഴി പഞ്ചായത്ത് പ്രസിഡന്റ് സോണിയ മനോജ് ആദരിച്ചു. ബ്ലോക്ക് പഞ്ചായത്ത് സ്ഥിര സമിതി അധ്യക്ഷന്‍ സതീഷ് കെ പണിക്കര്‍, വൈസ് പ്രസിഡന്റ് പൊന്നമ്മ ചാക്കോ, ആരോഗ്യ വിദ്യാഭ്യാസ സ്റ്റാന്റിങ് കമ്മറ്റി ചെയര്‍മാന്‍ രമാദേവി, ഹെല്‍ത്ത് സൂപ്പര്‍വൈസര്‍ എം കെ രാജു എന്നിവര്‍ പങ്കെടുത്തു.
ഹെല്‍ത്ത് ഇന്‍ഫര്‍മേഷന്‍ മാനേജ്‌മെന്റില്‍ ഡിപ്ലോമ
എസ്ആര്‍സി കമ്മ്യൂണിറ്റി കോളജിലെ ഡിപ്ലോമ ഇന്‍ ഹെല്‍ത്ത് ഇന്‍ഫര്‍മേഷന്‍ മാനേജ്‌മെന്റ് പ്രോഗ്രാമിലേക്ക് ബിരുദമുളളവര്‍ക്ക് അപേക്ഷിക്കാം. അവസാന തീയതി ഫെബ്രുവരി 15. ഫോണ്‍: 0471 2325101,9142041102, വെബ് സൈറ്റ് : www.srccc.in
പാരാ ലീഗല്‍ വോളന്റിയേഴ്‌സ് നിയമനം
കാണാതാകുന്നതും കുറ്റകൃത്യങ്ങള്‍ക്ക് ഇരയാക്കപ്പെടുന്ന കുട്ടികള്‍ക്ക് വേണ്ടിയുളള സ്‌കീം പ്രകാരം ജില്ലയിലെ അഞ്ച് പോലീസ് സബ് ഡിവിഷനുകളിലേക്ക് ദിവസവേതനാടിസ്ഥാനത്തില്‍ പാരാ ലീഗല്‍ വോളന്റിയേഴ്‌സിനെ തെരഞ്ഞെടുക്കുന്നതിന് സന്നദ്ധ സേവനതല്‍പ്പരരില്‍ നിന്ന് ജില്ലാ ലീഗല്‍ സര്‍വീസസ് അതോറിറ്റി അപേക്ഷ ക്ഷണിച്ചു. അടിസ്ഥാന യോഗ്യത ബിരുദം. എംഎസ്ഡബ്ല്യൂ, ബിരുദാനന്തര ബിരുദം യോഗ്യതയുളളവര്‍ക്ക് മുന്‍ഗണന. പ്രായപരിധി 25-65 വയസ്. നിയമ വിദ്യാര്‍ഥികള്‍ക്ക് 18-65 വയസ്. അപേക്ഷകര്‍ പേര്, വയസ്, മേല്‍വിലാസം, പഞ്ചായത്ത്, വിദ്യാഭ്യാസ യോഗ്യത, ഫോട്ടോ, ഫോണ്‍ നമ്പര്‍, ശരിപകര്‍പ്പുകള്‍സഹിതം സ്വയം തയാറാക്കിയ അപേക്ഷ ഫെബ്രുവരി 17ന് വൈകിട്ട് അഞ്ചിന് മുമ്പായി ചെയര്‍മാന്‍, ജില്ലാ ലീഗല്‍ സര്‍വീസസ് അതോറിറ്റി, മിനി സിവില്‍ സ്‌റ്റേഷന്‍, പത്തനംതിട്ട മേല്‍വിലാസത്തില്‍ നല്‍കണം. ഫോണ്‍ : 0468 2220141.
എസ് സി പ്രൊമോട്ടര്‍മാര്‍ക്ക് മാനസികാരോഗ്യ പരിശീലനം
ജില്ലാ മാനസികാരോഗ്യ പരിപാടിയുടെ ഭാഗമായി ജില്ലാ മെഡിക്കല്‍ ഓഫീസും ട്രൈബല്‍ വികസന വകുപ്പും സംയുക്തമായി എസ് ടി പ്രമോട്ടര്‍മാര്‍ക്ക് ഏകദിന പരിശീലനം നടത്തി. റാന്നി ബ്ലോക്ക് പഞ്ചായത്ത് കോണ്‍ഫറന്‍സ് ഹാളില്‍ നടന്ന ശില്‍പശാല റാന്നി എംഎല്‍എ അഡ്വ. പ്രമോദ് നാരായണ്‍ ഉദ്ഘാടനം ചെയ്തു. റാന്നി ബ്ലോക്ക് പഞ്ചായത്ത് പ്രസിഡന്റ് കെ എസ് ഗോപി അധ്യക്ഷനായി. ജില്ലാ മെഡിക്കല്‍ ഓഫീസര്‍ ഡോ. എല്‍. അനിതകുമാരി മുഖ്യപ്രഭാഷണം നിര്‍വഹിച്ചു. എന്‍ എച്ച് എം ജില്ലാ പ്രോഗ്രാം മാനേജര്‍ ഡോ. എസ് ശ്രീകുമാര്‍ സന്ദേശം നല്‍കി. ജില്ലാ ആശുപത്രി സീനിയര്‍ കണ്‍സള്‍ട്ടന്റ് ഇന്‍ സൈക്യാട്രി ഡോ. ടി. സാഗര്‍ വിഷയമവതരിപ്പിച്ചു. സൂപ്രണ്ട് ഡോ. നിതീഷ് ഐസക് സാമുവല്‍, ക്ലിനിക്കില്‍ സൈക്കോളജിസ്റ്റ് ഡോ. പി.ടി സന്ദീഷ് , ട്രൈബല്‍ എക്സ്റ്റന്‍ഷന്‍ ഓഫീസര്‍ ഗോപകുമാര്‍, സൈക്യാട്രിക് സോഷ്യല്‍ വര്‍ക്കര്‍ എം ആര്‍ അനീഷ് തുടങ്ങിയവര്‍ പങ്കെടുത്തു.
യുവപ്രതിഭാ പുരസ്കാരം അപേക്ഷ ക്ഷണിച്ചു
ശാരീരിക – മാനസിക പരിമിതികളെ അതിജീവിച്ച് സമൂഹത്തില്‍ തങ്ങളുടെതായ ഇടം കണ്ടെത്തി യുവതയ്ക്ക് പ്രചോദനമായ യുവജനങ്ങള്‍ക്ക് കേരള സംസ്ഥാന യുവജന കമ്മീഷന്‍ യുവപ്രതിഭാ പുരസ്കാരം നല്‍കുന്നു. പുരസ്‌കാരത്തിനായി നാമനിര്‍ദേശം നല്‍കുകയോ സ്വമേധയാ അപേക്ഷ സമര്‍പ്പിക്കുകയോ ചെയ്യാം. പൊതുജനങ്ങളില്‍ നിന്നും കിട്ടുന്ന നിര്‍ദേശങ്ങള്‍ പരിഗണിച്ച് വിദഗ്ധ ജൂറിയുടെ തീരുമാനത്തിനു വിധേയമായി മൂന്ന് പേര്‍ക്ക് 15000 രൂപയുടെ കാഷ് അവാര്‍ഡും ബഹുമതി ശില്‍പ്പവും നല്‍കും. 18 നും 40 നും ഇടയില്‍ പ്രായമുള്ള ഭിന്നശേഷിക്കാര്‍ ഫോട്ടോ ഉള്‍പ്പെടെ വിശദമായ ബയോഡേറ്റ [email protected] മെയില്‍ ഐ.ഡിയിലോ വികാസ് ഭവനിലുള്ള കമ്മീഷന്‍ ഓഫീസില്‍ തപാല്‍ മുഖേനയോ നേരിട്ടോ അപേക്ഷ നല്‍കാം. അവസാന തീയതി: ഫെബ്രുവരി എട്ട്. വിലാസം: കേരള സംസ്ഥാനയുവജന കമ്മീഷന്‍, വികാസ് ഭവന്‍, പി.എം. ജി, തിരുവനന്തപുരം -33. ഫോണ്‍ 0471-2308630
അപ്രന്റിസ് മേള
പ്രധാനമന്ത്രി നാഷണല്‍ അപ്രന്റീസ്ഷിപ്പ് മേളയോടനുബന്ധിച്ച് ജില്ലാതല അപ്രെന്റീസ് മേള ഫെബ്രുവരി 10 ന് രാവിലെ 9.30ന് ചെന്നീര്‍ക്കര ഐടിഐയില്‍ നടക്കും. തെരഞ്ഞെടുക്കുന്നവരെ ഒരു വര്‍ഷം അപ്രെന്റീസ് ആയി നിയമിക്കും. ഐടിഐ പാസായ ട്രെയിനികള്‍ക്ക് പങ്കെടുക്കാം. ട്രേഡ് സര്‍ട്ടിഫിക്കറ്റ്, ആധാര്‍, ഫോട്ടോ, മറ്റ് അനുബന്ധ രേഖകളുമായി ഐടിഐ എത്തണം. ഫോണ്‍: 0468 2258710.
നാടന്‍പാട്ട് മത്സരം
സംസ്ഥാന യുവജന ക്ഷേമബോര്‍ഡ് കലാഭവന്‍ മണിയുടെ സ്മരണാര്‍ഥം ‘മണിനാദം 2025’ സംസ്ഥാനതല നാടന്‍പാട്ട്മത്സരം ചാലക്കുടിയില്‍ സംഘടിപ്പിക്കുന്നു. ജില്ലാതലത്തില്‍ ഒന്നാംസ്ഥാനം ലഭിക്കുന്ന ടീമിന് സംസ്ഥാനതല മത്സരത്തില്‍ പങ്കെടുക്കാം. യുവജനക്ഷേമബോര്‍ഡില്‍ അഫിലിയേറ്റ് ചെയ്ത യൂത്ത്/യുവ/അവളിടം ക്ലബുകളിലെ 18നും 40നും മധ്യേ പ്രായമുള്ള 10 പേരടങ്ങുന്ന ടീമിന് മത്സരത്തില്‍ പങ്കെടുക്കാം. മത്സരത്തിന് അനുവദിക്കുന്ന പരമാവധി സമയം 10 മിനിട്ട്. ജില്ലാതലത്തില്‍ ഒന്ന്, രണ്ട്, മൂന്ന് സ്ഥാനം നേടുന്നവര്‍ക്ക് യഥാക്രമം 25,000, 10,000, 5,000 രൂപ വീതവും സംസ്ഥാന തലത്തില്‍ യഥാക്രമം 1,00,000, 75,000, 50,000 രൂപ വീതവും പ്രൈസ്മണിയായി നല്‍കുന്നു. ഫെബ്രുവരി15 ന് വൈകിട്ട് അഞ്ചിന് മുമ്പ് പങ്കെടുക്കുന്നവരുടെ പേര് , വിലാസം, ജനന തീയതി, ഫോണ്‍ നമ്പര്‍ എന്നിവ സഹിതം ജില്ലായൂത്ത് പ്രോഗ്രാം ഓഫീസര്‍, കേരളസംസ്ഥാന യുവജന ക്ഷേമബോര്‍ഡ്, ജില്ലായുവജന കേന്ദ്രം, പുത്തന്‍പാലത്ത് ബില്‍ഡിംഗ്, കളക്‌ട്രേറ്റിനു സമീപം, പത്തനംതിട്ട-689645 വിലാസത്തിലോ [email protected] ഇ-മെയിലിലോ അപേക്ഷ സമര്‍പ്പിക്കാം. ഫോണ്‍ :0468 2231938, 9847545970.
കമ്മ്യൂണിറ്റി കൗണ്‍സിലര്‍ ഒഴിവ്
ജില്ലയിലെ വിവിധ സിഡിഎസുകളിലെ കമ്മ്യൂണിറ്റി കൗണ്‍സിലര്‍ ഒഴിവിലേക്ക് അപേക്ഷ ക്ഷണിച്ചു. യോഗ്യത – എംഎസ് ഡബ്ല്യൂ/എംഎ സോഷ്യോളജി, എംഎ/എംഎസ് സി സൈക്കോളജി. ബയോഡേറ്റ സഹിതം അപേക്ഷ ഫെബ്രുവരി ഏഴിന് വൈകുന്നേരം അഞ്ചിനകം കുടുംബശ്രീ ജില്ലാ മിഷന്‍, മൂന്നാംനില, കളക്ടറേറ്റ്, പത്തനംതിട്ട വിലാസത്തില്‍ സമര്‍പ്പിക്കണം. ഫോണ്‍ : 8547549665.
തെളിവെടുപ്പ് യോഗം
മോട്ടര്‍ ട്രാന്‍സ്പോര്‍ട്ട് വ്യവസായവുമായി ബന്ധപ്പെട്ട തൊഴിലാളികള്‍, ട്രേഡ് യൂണിയന്‍ -തൊഴിലുടമ പ്രതിനിധികള്‍, ഉദ്യോഗസ്ഥര്‍ എന്നിവരുടെ തെളിവെടുപ്പ് യോഗം ഫെബ്രുവരി 21 ന് ആലപ്പുഴ ഗസ്റ്റ് ഹൗസില്‍ നടക്കും. ഫോണ്‍ : 0468 – 2222 234, 8547 655 259.