konnivartha.com : ഭർത്താവിന്റെയും ഭർതൃ മാതാവിന്റെയും പീഡനത്തിൽ മനംനൊന്ത് ഭർത്താവിന്റെ വീട്ടിൽ യുവതി ആത്മഹത്യ ചെയ്ത കേസിൽ ഭർതൃ മാതാവിനെ പോലീസ് അറസ്റ്റ് ചെയ്തു. കോന്നി കുമ്മണ്ണൂർ സ്വദേശിനി ഷംനയുടെ ആത്മഹത്യയുമായി ബന്ധപ്പെട്ട ഭർത്താവിൻറെ മാതാവ് മൻസൂറത്തിനെയാണ് പോലീസ് അറസ്റ്റ് ചെയ്തത്.
മാർച്ച് 24 ലായിരുന്നു കോന്നി കുമ്മണ്ണൂരിലെ ഭർത്താവിന്റെ വീട്ടിൽ ഷംന ആത്മഹത്യയ്ക്ക് ശ്രമിച്ചത്. ഭർത്താവും ബന്ധുക്കളും ചേർന്ന് യുവതിയെ വീട്ടിൽ നിന്ന് ആശുപത്രിയിൽ എത്തിച്ചിരുന്നുവെങ്കിലും ആശുപത്രിയിൽ വച്ച് യുവതി മരിച്ചു.ഇതോടെയാണ് യുവതി ഭർത്താവിൻറെ വീട്ടിൽ കടുത്ത ശാരീരിക മാനസിക പീഡനങ്ങൾക്ക് ഇരയായിരുന്നതായി ബന്ധുക്കൾ ആരോപിച്ചത്.
പീഡന വിവരങ്ങൾ എഴുതിവെച്ച ഡയറി പോലീസ് കണ്ടെത്തുകയും ചെയ്തിരുന്നു.എന്നാൽ ഷംനയുടെ മരണം നടന്ന ആഴ്ചകൾ പിന്നിട്ടിട്ടും മറ്റു നടപടികൾ ഉണ്ടാകാതിരുന്നതോടെ പോലീസിനെതിരെ കുടുംബം രംഗത്ത് വന്നു.ഇതിന് പിന്നാലെയാണ് ഭർത്താവ് ജഹാമിന്റെ അമ്മ മൻസൂറത്തിനെ പോലീസ് അറസ്റ്റ് ചെയ്തത്. IPC 306 വകുപ്പ് ചുമത്തിയായിരുന്നു അറസ്റ്റ്.
ഭർത്താവായ ജഹാമും ഭർത്താവിന്റെ അമ്മയും ചേർന്ന് ഷംനയെ ശാരീരികവും മാനസികമായി ഉപദ്രവിച്ചിരുന്നതായി ഷംനയുടെ അമ്മയും സഹോദരിയും പോലീസിന് മൊഴി നൽകിയിരുന്നു.ഷംനയുടെ ഡയറിയിലും നേരിട്ടിരുന്ന പീഡനത്തെ കുറിച്ചുള്ള വിവരങ്ങൾ ഉണ്ടായിരുന്നതാണ് സൂചന.കേസിൽ ഷംനയുടെ ഭർത്താവിന്റെയും അറസ്റ്റ് ഉണ്ടാകാനുള്ള സാധ്യതയുണ്ടെന്നാണ് പോലീസ് നൽകുന്ന വിവരം.ഷംനയുടെ ഭർതൃമാതാവ് മൻസൂറത്തിനെ കോടതിയിൽ ഹാജരാക്കി റിമാൻഡ് ചെയ്തു.