എന്റെ കേരളം മേള: സംഘാടക സമിതി യോഗം (ഏപ്രില്‍ 11)
സംസ്ഥാന സര്‍ക്കാരിന്റെ രണ്ടാം വാര്‍ഷികത്തോട് അനുബന്ധിച്ച് സംഘടിപ്പിക്കുന്ന എന്റെ കേരളം പ്രദര്‍ശന വിപണന മേളയുടെ സംഘാടക സമിതി രൂപീകരണ യോഗം (ഏപ്രില്‍ 11) രാവിലെ 9.30ന് പത്തനംതിട്ട കളക്ടറേറ്റ് കോണ്‍ഫറന്‍സ് ഹാളില്‍ ആരോഗ്യ വകുപ്പ് മന്ത്രി വീണാ ജോര്‍ജിന്റെ അധ്യക്ഷതയില്‍ ചേരും.
ഏഴംകുളം-കൈപ്പട്ടൂര്‍ റോഡിന്റെ നിര്‍മാണ ഉദ്ഘാടനം ഏപ്രില്‍ 11ന്
ഏഴംകുളം – കൈപ്പട്ടൂര്‍ റോഡിന്റെ നിര്‍മാണ ഉദ്ഘാടനം ഏപ്രില്‍ 11ന് വൈകുന്നേരം 4.30ന് കൊടുമണ്‍ ജംഗ്ഷനില്‍ പൊതുമരാമത്ത് വകുപ്പ് മന്ത്രി പി.എ. മുഹമ്മദ് റിയാസ് നിര്‍വഹിക്കും. നിയമസഭ ഡെപ്യുട്ടി സ്പീക്കര്‍ ചിറ്റയം ഗോപകുമാര്‍ അധ്യക്ഷത വഹിക്കും.ആന്റോ ആന്റണി എംപി, അഡ്വ. കെ.യു. ജനീഷ് കുമാര്‍ എംഎല്‍എ, ജില്ലാ കളക്ടര്‍ ഡോ. ദിവ്യ എസ് അയ്യര്‍ എന്നിവര്‍ മുഖ്യാതിഥികളാകും. ജനപ്രതിനിധികള്‍, സാമൂഹിക, രാഷ്ട്രീയ രംഗങ്ങളിലെ പ്രമുഖര്‍ തുടങ്ങിയവര്‍ പങ്കെടുക്കും.കിഫ്ബിയില്‍ നിന്നും 41.18 കോടി രൂപയുടെ സാമ്പത്തിക അനുമതി ലഭിച്ച പദ്ധതി കേരളാ റോഡ് ഫണ്ട് ബോര്‍ഡിന്റെ ചുമതലയിലാണ് നിര്‍മാണം നടത്തുന്നത്. അടൂര്‍, കോന്നി നിയോജകമണ്ഡലങ്ങളിലെ ജനങ്ങള്‍ക്ക് പ്രയോജനം ലഭിക്കുന്നതാണ് ഈ റോഡ്. കായംകുളം – പുനലൂര്‍ സംസ്ഥാന പാതയില്‍ നിന്ന് ആരംഭിച്ച് അടൂര്‍-പത്തനംതിട്ട ദേശീയ പാതയില്‍ ചേരുന്നതാണ് ഈ റോഡ്. അടൂര്‍, കോന്നി താലൂക്കുകളില്‍ ഉള്‍പ്പെട്ട ഈ റോഡ് എംസി റോഡിനും എന്‍എച്ചിനും സമാന്തരമായി ഏഴംകുളം, കൊടുമണ്‍, വള്ളിക്കോട് എന്നീ പഞ്ചായത്തുകളിലൂടെ കടന്നു പോകുന്നു. ഈ റോഡ് പൂര്‍ത്തിയാകുന്നതോടെ ഈ മേഖലയുടെ സമഗ്രവികസനം സാധ്യമാകും.
സംസ്ഥാന സര്‍ക്കാരിന്റെ രണ്ടാം വാര്‍ഷികത്തോട് അനുബന്ധിച്ച് 100 ദിന കര്‍മ പരിപാടിയുടെ ഭാഗമായി പൊതുമരാമത്ത് വകുപ്പ് നിര്‍മാണം പൂര്‍ത്തിയാക്കിയ കുമ്പഴ – മലയാലപ്പുഴ റോഡിന്റെ ഉദ്ഘാടനം ഏപ്രില്‍ 11ന് രാവിലെ 11.30ന് മുഖ്യമന്ത്രി പിണറായി വിജയന്‍ ഓണ്‍ലൈനായി ഉദ്ഘാടനം ചെയ്യും. പൊതുമരാമത്ത്, ടൂറിസം വകുപ്പ് മന്ത്രി പി എ മുഹമ്മദ് റിയാസ് അധ്യക്ഷത വഹിക്കും. കുമ്പഴ ലിജോ ഓഡിറ്റോറിയത്തില്‍ നടക്കുന്ന ചടങ്ങില്‍ ശിലാഫലകം അനാച്ഛാദനവും മുഖ്യപ്രഭാഷണവും ആരോഗ്യവകുപ്പ് മന്ത്രി വീണാ ജോര്‍ജ് നിര്‍വഹിക്കും. ഇതുള്‍പ്പെടെ നിര്‍മാണം പൂര്‍ത്തിയാക്കിയ 18 റോഡുകളുടെ ഉദ്ഘാടനമാണ് മുഖ്യമന്ത്രി നിര്‍വഹിക്കുന്നത്.
കരുതലും കൈത്താങ്ങും: താലൂക്ക് അദാലത്തില്‍ ഏപ്രില്‍ 15 വരെ പരാതി സമര്‍പ്പിക്കാം
* പരാതികള്‍ പൂര്‍ണമായി സൗജന്യമായി നല്‍കാം
* പരാതികളും അപേക്ഷകളും സ്വീകരിക്കാന്‍ താലൂക്ക് അദാലത്ത് സെന്ററിലും
വെബ്‌സൈറ്റിലും സൗകര്യം
സംസ്ഥാന സര്‍ക്കാരിന്റെ രണ്ടാം വാര്‍ഷികത്തോടനുബന്ധിച്ച് കരുതലും കൈത്താങ്ങും എന്ന പേരില്‍ നടത്തുന്ന പരാതി പരിഹാര അദാലത്തില്‍ പൊതുജനങ്ങള്‍ക്ക് പരാതി സമര്‍പ്പിക്കുവാനുള്ള സമയപരിധി ഏപ്രില്‍ 15 വരെ ദീര്‍ഘിപ്പിച്ചു. പരാതികള്‍ പൂര്‍ണമായും സൗജന്യമായി സമര്‍പ്പിക്കാം. ഏപ്രില്‍, മെയ് മാസങ്ങളില്‍ മന്ത്രിമാരുടെ നേതൃത്വത്തിലാണ് അദാലത്തുകള്‍ നടക്കുക.
ഹ്രസ്വകാല / വെക്കേഷന്‍ കോഴ്സ്
കേരള സര്‍ക്കാര്‍ സ്ഥാപനമായ കെല്‍ട്രോണ്‍ ആലുവ നോളഡ്ജ് സെന്ററിലൂടെ ഹ്രസ്വകാല / വെക്കേഷന്‍ കോഴ്സുകളിലേക്ക് അപേക്ഷ ക്ഷണിച്ചു. ഗ്രാഫിക്‌സ് ആന്റ് വിഷ്വല്‍ ഇഫക്ട്സ്, പൈത്തോണ്‍ പ്രോഗ്രാമിംഗ്, ഇന്ത്യന്‍ ആന്റ് ഫോറിന്‍ അക്കൗണ്ടിംഗ്, വേര്‍ഡ് പ്രോസസിംഗ് ആന്റ് ഡാറ്റ എന്‍ട്രി, ടാലി, ആര്‍ക്കിടെക്ചര്‍ ഡ്രാഫ്റ്റിംഗ് ആന്റ് ലാന്‍ഡ് സര്‍വെ, സിസിടിവി ടെക്നോളോജിസ് എന്നീ കോഴ്സുകളിലേക്ക് ഏത് പ്രായക്കാര്‍ക്കും അപേക്ഷിക്കാം. വിവരങ്ങള്‍ക്ക് കെല്‍ട്രോണ്‍ നോളഡ്ജ് സെന്റര്‍, രണ്ടാം നില, സാന്റോ കോംപ്ലക്സ്, റെയില്‍വേ സ്റ്റേഷന്‍ റോഡ്, പെട്രോള്‍ പമ്പ് ജംഗ്ഷന്‍, ആലുവ എന്ന വിലാസത്തിലോ 8136802304 എന്ന നമ്പറിലോ ബന്ധപ്പെടണം.
ക്ലര്‍ക്ക് നിയമനം
അടൂര്‍ സര്‍ക്കാര്‍ പോളിടെക്നിക് കോളജിലെ തുടര്‍ വിദ്യാഭ്യാസ കേന്ദ്രത്തിലേക്ക് താത്കാലികമായി ഒരു ക്ലര്‍ക്കിനെ നിയമിക്കുന്നു. ബികോം ബിരുദവും ടാലിയുമാണ് വിദ്യാഭ്യാസ യോഗ്യത. കമ്പ്യൂട്ടര്‍ ഡേറ്റാ എന്‍ട്രി പരിജ്ഞാനം അഭികാമ്യം. താത്പര്യമുളളവര്‍ ഏപ്രില്‍ 19 ന് അസല്‍ സര്‍ട്ടിഫിക്കറ്റുകളുമായി അഭിമുഖത്തിന് രാവിലെ 10 ന് കോളജില്‍ ഹാജരാകണം.
ക്വട്ടേഷന്‍ തീയതി നീട്ടി
പത്തനംതിട്ട ജില്ലാതല എന്‍ഫോഴ്സ്മെന്റ് സ്‌ക്വാഡിന്റെ ഔദ്യോഗിക ആവശ്യങ്ങള്‍ക്കായി പ്രതിമാസ നിരക്കില്‍ വാഹനം ലഭ്യമാക്കുന്നതിന് ഏപ്രില്‍ 12 ന് നിശ്ചയിച്ചിരുന്ന ക്വട്ടേഷന്‍ സമര്‍പ്പിക്കുന്നതിനുള്ള സമയം ഏപ്രില്‍ 13 വരെയും ക്വട്ടേഷന്‍ തുറന്ന് പരിശോധിക്കുന്ന സമയം അന്നേ ദിവസം മൂന്നുവരെയും നീട്ടിവച്ചിരിക്കുന്നു. ഫോണ്‍ : 0468-2322014.
ബയോമെട്രിക് മസ്റ്ററിംഗ്
വളളിക്കോട് ഗ്രാമപഞ്ചായത്തില്‍ നിന്നും 2022 ഡിസംബര്‍ മാസം വരെ പെന്‍ഷന്‍ കൈപ്പറ്റിയ എല്ലാ ഗുണഭോക്താക്കളും ജൂണ്‍ 30 ന് മുന്‍പായി അക്ഷയ കേന്ദ്രങ്ങള്‍ വഴി ബയോമെട്രിക് മസ്റ്ററിംഗ് പൂര്‍ത്തിയാക്കണമെന്ന് വളളിക്കോട് ഗ്രാമപഞ്ചായത്ത് സെക്രട്ടറി അറിയിച്ചു.
നഗരത്തിലെ എല്ലാ വീടുകളിലും ശുദ്ധജലം എത്തിക്കുക എന്ന ലക്ഷ്യത്തോടെ കേന്ദ്ര സംസ്ഥാന സര്‍ക്കാരുകളുടെ സഹായത്തോടെ പത്തനംതിട്ട നഗരസഭയുടെ തനത് വിഹിതം കൂടി ഉപയോഗിച്ച് സംയുക്തമായി നടപ്പാക്കുന്ന അമൃത് 2.0 പദ്ധതിയുടെ ഒന്നാം ഘട്ട നിര്‍മ്മാണ പ്രവര്‍ത്തനങ്ങള്‍ക്ക് തുടക്കമാകുന്നു.
സാമൂഹ്യ സുരക്ഷ പെന്‍ഷന്‍, വിവിധ ക്ഷേമ നിധികളില്‍ നിന്നും പെന്‍ഷന്‍ വാങ്ങുന്നവര്‍ തുടങ്ങിയ വിഭാഗങ്ങള്‍ക്കായി സംസ്ഥാന സര്‍ക്കാര്‍ അക്ഷയ കേന്ദ്രങ്ങളിലൂടെ നടപ്പാക്കി വരുന്ന മസ്റ്ററിങ് പത്തനംതിട്ട ജില്ലയില്‍ പുരോഗമിക്കുന്നു. ജില്ലയില്‍ ഇതിനകം 31022 ഗുണ ഭോക്താക്കള്‍ മസ്റ്ററിങ് നടത്തിക്കഴിഞ്ഞു. സംസ്ഥാന ധനവകുപ്പ് പുറത്തിറക്കിയ ഉത്തരവു പ്രകാരം ഐടി മിഷന്റെ കീഴില്‍ പ്രവര്‍ത്തിക്കുന്ന അക്ഷയ കേന്ദ്രങ്ങളിലൂടെ ജൂണ്‍ 30 വരെ മസ്റ്ററിങ് നടത്തുന്നതിന് സമയം അനുവദിച്ചിട്ടുണ്ട്. ഇതിനായി അക്ഷയ കേന്ദ്രങ്ങള്‍ക്ക് സര്‍ക്കാര്‍ പ്രത്യേക യൂസര്‍ ഐഡിയും, പാസ് വേഡും നല്‍കിയിട്ടുണ്ട്.
കൊയ്ത്തുത്സവം ഉദ്ഘാടനം ചെയ്തു
തുമ്പമണ്‍ ഗ്രാമപഞ്ചാത്തിന്റെയും വിജയപുരം മാവര പാടശേഖര സമിതിയുടെയും സംയുക്ത ആഭിമുഖ്യത്തില്‍ സംഘടിപ്പിച്ച കൊയ്ത്തുത്സവം ആന്റോ ആന്റണി എംപി ഉദ്ഘാടനം ചെയ്തു. കൊയ്ത്ത് പാട്ടിന്റെയും നാടന്‍ കലാപരിപാടികളുടെയും അകമ്പടിയോടെയാണ് കൊയ്തു ഉത്സവം ആരംഭിച്ചത്. വിജയപുരം മാവര പുഞ്ചയില്‍ നടന്ന കൊയ്ത്തുത്സവത്തില്‍ ജനപ്രതിനിധികളും കര്‍ഷകരും ഉള്‍പ്പടെയുള്ളവര്‍ 50 ഏക്കര്‍ സ്ഥലത്തത്താണ് കൃഷി ചെയ്തത്.
തുമ്പമണ്‍ ഗ്രാമപഞ്ചായത്ത് പ്രസിഡന്റ് റോണി സക്കറിയ അധ്യക്ഷത വഹിച്ച ചടങ്ങില്‍ പഞ്ചായത്ത് വൈസ് പ്രസിഡന്റ് അഡ്വ.ടി എ രാജേഷ് കുമാര്‍, തോമസ് ടി വര്‍ഗ്ഗീസ്, ബീന വര്‍ഗീസ്, ഗ്രാമപഞ്ചായത്ത് അംഗങ്ങളായ ഷിനു മോള്‍, കെ സി പവിത്രന്‍, മോനി ബാബു, കെ കെ അമ്പിളി, സക്കറിയ വര്‍ഗ്ഗീസ്, പാടശേഖര സമിതി പ്രസിഡന്റ് ബാബു ജോര്‍ജ്, കൃഷി വകുപ്പ് ഉദ്യേഗസ്ഥര്‍ എന്നിവര്‍ പങ്കെടുത്തു.
പരിശോധന നടത്തും
നിരോധിത ക്യാരി ബാഗുകള്‍ ഉപയോഗിക്കുന്ന കച്ചവടക്കാര്‍ക്കെതിരെ ഇന്നു (11) മുതല്‍ പരിശോധന നടത്തി ഫൈന്‍ ഈടാക്കുകയും കേസ് എടുക്കുകയും ചെയ്യുമെന്ന് ഇലന്തൂര്‍ പഞ്ചായത്ത് സെക്രട്ടറി സന്ദീപ് ജേക്കബ് അറിയിച്ചു. ഫോണ്‍ :9496042643