konnivartha.com : ചെങ്ങറയിലും അരുവാപ്പുലത്തും ഗതാഗതത്തിന് തടസമാവുകയാണ് റോഡിൽ അലഞ്ഞു നടക്കുന്ന കന്നുകാലികൾ. അട്ടച്ചാക്കൽ – കുമ്പളാംപൊയ്ക റോഡിൽ ചെങ്ങറ എൽ.പി സ്കൂൾ മുതൽ കുമ്പഴ തോട്ടം വരെയുള്ള ഭാഗത്തും അരുവാപ്പുലം കല്ലേലി പള്ളി ഭാഗത്തെ റോഡിലുമാണ് അലഞ്ഞു തിരിയുന്ന കന്നു കാലികള്‍ ഉള്ളത് .
കൃഷിയിടങ്ങളിലും ഇവയുടെ ശല്യമുണ്ട്. പകൽ മാത്രമല്ല രാത്രിയിലും റോഡിൽ ഇവയുണ്ട്. ചെങ്ങറ കുരുമുട് ജംഗ്ഷൻ, വ്യൂ പോയിന്റ്, അമ്പലം ജംഗ്ഷൻ, ചിറത്തിട്ട ജംഗ്ഷൻ എന്നിവടങ്ങളിലെല്ലാം ഇവയെ കാണാം. കുമ്പഴത്തോട്ടത്തിലെ ലയങ്ങളിലുള്ള തൊഴിലാളികളുടെ കന്നുകാലികളാണ് ഇവ. റബർ തോട്ടത്തിൽ മേയാൻ വിടുന്ന ഇവയെ തൊഴുത്തുകളിൽ കെട്ടാറില്ല. പ്രസവിക്കുമ്പോൾ മാത്രമാണ് തൊഴുത്തുകളിൽ കെട്ടുന്നത്. രാത്രിയിൽ കൃഷിയിടങ്ങളിലെ കാർഷികവിളകൾ നശിപ്പിക്കുന്ന ഇവ വീടുകളുടെ സിറ്റൗട്ടിലും കടകളുടെ വരാന്തകളിലുമാണ് കിടക്കുന്നത്.
അട്ടച്ചാക്കൽ – കുമ്പളാംപൊയ്ക റോഡിൽ രാത്രിയിൽ വളവുകൾ തിരിഞ്ഞുവരുന്ന നിരവധി വാഹനങ്ങൾ കന്നുകാലിക്കൂട്ടങ്ങളുടെ മുന്നിൽപ്പെട്ട് അപകടങ്ങളും സംഭവിക്കുന്നു.
അരുവാപ്പുലത്തും കഴിഞ്ഞ ദിവസം ബൈക്ക് യാത്രികന്‍ കന്നു കാലികളുടെ ഇടയിലേക്ക് ആണ് ബൈക്കുമായി കയറിയത് . അലഞ്ഞു തിരിയുന്ന കന്നു കാലികളെ ഉടമകള്‍ സ്വന്തം ഉത്തരവാദിത്വത്തില്‍ തൊഴുത്തില്‍ പാര്‍പ്പിക്കാന്‍ ശ്രമിക്കുന്നില്ല എങ്കില്‍ ഇത്തരം കന്നു കാലികളെ പഞ്ചായത്ത് ഏറ്റെടുത്തു ലേലം ചെയ്യണം എന്നാണ് ജനകീയ ആവശ്യം . മൃഗ സംരക്ഷണ വകുപ്പ് ഉചിതമായ നടപടി സ്വീകരിക്കണം .